Ïaid rally ka JSM bad ki paidbah Khanduli ban dawa weng ïa ka ‘Entry Tax Gate’ ka KAAC

Jowai, Naitung 13: Ka Jaiñtia Students’ Movement (JSM) ha ryngkat ki nongshong shnong ka Khanduli mynta ka sngi Palei haka por kumba 12 shiteng nohphai sngi kila pynlong da ka jingïaid rally kaba la sdang naduh Wah Gate (Petrol Pump) bad ïaid na Ïawmusiang sha khyrdop ka DC ophis bad leit pynlong jingïalang ha phyllaw ka Jaiñtia Hills Autonomous District Council (JHADC).
Kane ka jingmih paidbah jong ki ha ryngkat ki lama bad ki jingpyrta pynrem ka long halor ka nongrim ban dawa naka sorkar ka ban weng noh ïa ka ‘Entry Tax Gate’ kaba don ha ka shnong Khanduli West Jaiñtia Hills District ïa kaba la pynïeng jubor da ki bor ka Karbi Anglong Autonomous Council (KAAC) naduh ka 15 tarik jong u bnai Ïaïong mynta ka snem, kaba dang hap hapoh u pud u sam jong ka Khanduli.
Ha ka jingïalang ba la pynlong hapoh ka phyllaw ka JHADC kiba bun na ki nongkren kila pynrem jur ïa u Chief Executive Member bad kumjuh ïa baroh ki MDC ka JHADC kiba long tang kum ki nongthiah sngi da kaba kim pyrkhat shuh ïa ka kyndew ka shyiap jong ka Ri bad ka Jaitbynriew, da kaba pynsngew na ki nongshong shnong ‘ba ka shnong Khanduli ka dei ka dieng kper kaba ïada na ka jingwan kyntur pud jong ka Assam’.
U Waheh Shnong ka Khanduli ma Yoshida Nongspung bad ki katto katne ngut ki riewrangbah ha ka jingkren kila pynpaw ka jingsngewsih ba ïohi ïa ka jingeh ba ki nongrep ki ïa kynduh naduh ba mih ka jinghuri hara hapdeng ki ar jaitbynriew kata ki Pnar bad ki Karbi.
Shuh shuh kila ïathuh la bun sien ki la dep ban pynsngew ïa kane ka jingeh sha ki nongmihkhmat kumjuh sha ka bor District bad wat shaduh ka sorkar jylla, hynrei haduh mynta ki dang ap khmih lynti ïa kata ka jingkular ban wanrah ïa ka jingshong suk shong shngaiñ.
La pynsngew haduh mynta ïa ka Entry Tax Gate jong ka Assam kaba don ha Khanduli la ap pahara da ki pulit Assam, katba ïa ki jaka rep jong ki Pnar kiba don sha thaiñ Karbi la eh sah ïa ki kumto na ka daw ba kim nud shuh ban leit rep.
Hadien kane ka jingïalang na JHADC kila leit tur sha ka ophis u Deputy Commissioner ka West Jaintia Hills District ha phyllaw ka DC, na ka liang u President JSM Western Region samla Ribok Biam ula kren shai lada ka sorkar kam sngap ïa kane ka jingdawa jong ka seng ha ryngkat ki paidbah ka Khanduli kin leit weng noh ïa katei ka Tax Gate bad lada jia kano kano ka jingïa um snam ka sorkar ka die ban kit khlieh, la ong utei u President.
Kine ki nongïalam ka JSM ha ryngkat ki nongïalam shnong kila ïoh lad ban leit ïa kynduh bad u DC ha ophis treikam jong u, hadien kane ka jingïakynduh na ka liang u Waheh Shnong ka Khanduli ma Yoshida Nongspung ula pynsngew na ka liang u DC ruh ula kular ban shimkhia ïa kane hapoh ka shi taiew ban ïakren sngewthuh bad ki bor ka Assam.
U ma Nongspung ula kren shai hapoh kane ka shi taiew kin sangeh shwa ïa ka jingïakhih da kaba ap ïa katei ka jingpynbeit, hynrei lada kane kam urlong ki lah ban shim biang ïa ki jingïakhih da kiwei pat ki lynti.