Pynsangeh ka Sorkar ïa ki hukum Odd & Even Number da ka jingïakhih ki nongñiah taksi

Shillong, Naitung, 13: Ka Sorkar Jylla ha ka sngi Palei ka la rai ban pynsangeh shwa ban pyntreikam ïa ka odd-even system na ka bynta ki kali kamai kiba ïaid naduh Kachari Point ter ter sha Khyndailad bad haduh Motphran.
Ka Sorkar ka la shim ïa kane ka rai hadien ba ki nongñiah taksi kamai ki la ïakhih da kaba sangeh lut ïa ki kali ha surok syndah u Mot Kiang Nangbah hajan ka Shillong Civil Hospital kum ka jingpyrshah ïa ka jingpyntreikam ïa ka odd-even system. Kane ka jingïakhih jong ki nongñiah kali kamai ka la wanrah ïa ka jingdheng kali kaba jur bha ha baroh kawei nongbah Shillong.
Hadien ba la wai ka jingïalang pyrkhat kam, u Symbud Myntri Rangbah uba peit ïa ka tnat Kam Pohing Bah Prestone Tynsong u la ong, “ngi la shim ïa ka rai ba ka hukum ba pynjari ïa ki odd bad even number yn pynsangeh noh mardor. Ka Sorkar kan sa shong biang sa shisien ban khmih biang ïa kane ka kam shwa ban shim da kawei pat ka sienjam.:
“Kano kano ka rai ba la shim, ka dei ban long na ka bynta ka bit ka biang bad ka jingbha lang baroh ki nongshong shnong ka jylla Meghalaya, la kular u Bah Prestone.
Shwa kane, ki nongñiah taksi kiba pyrshah ïa ka jingpyntreikam ïa ka Odd bad Even system ki la kyntait ban mih na ka jaka ba ki la pynlong ka jingïakhih wat hapdeng ka jingpyrshang ban pynsngewthuh da ki bor synshar distrik bad ki bor pulit. Shipor ka la mih ruh ka jingïania kaba jur hapdeng ki nongñiah taksi bad ki Majistor.
Ha ka jingïakren bad ki lad pathai khubor u President jong ka East Khasi Hills Local Taxi Welfare Association (EKHLTWA) Bah Wandonbok Jyrwa u la kynnoh ba ka Deputy Commissioner jong ka East Khasi ka la shim ïa kane ka rai ban pyntreikam da ki Odd bad Even number khlem ka jingïasyllok bad ki nongñiah taksi kamai kiba ju im kamai jakpoh ban kit ïa ki nongleit nongwan ha ka thaiñ Khyndai Lad bad Motphran.
“Kumno ngin pyndap ïa ki jingdawa ha ka ing ka sem haba la ailad ïa ngi ban kamai tang 15 sngi ha ka shi bnai? Hato ki khun jong ngi kin bamja tang 15 sngi ha ka shi bnai?” la buh jingkylli ki nongñiah kali ha ka thma ktien bad ki Pulit bad ki Majistor.