Shillong, Naitung, 13: Hadien ba la pyndam noh ïa ka hukum ban khang dukan haduh ka por 10 baje mynmiet, ka Deputy Commissioner jong ka East Khasi Hills District ka Kong Rosetta Mary Kurbah ha ka sngi Palei ka la pynkylla ïa ka hukum kaba pyrkhing ïa ki kynta ban plie ïa ki dukan, ki dukan die jingbam, ki restaurant bad ki Enterprises tang ha ki katto katne ki bynta jong ka nongbah.
Katkum kane ka hukum ba la pynmih thymmai, yn shah ban plie tang haduh ka por 11:30 baje mynmiet bad kane ka hukum kan treikam noh mardor naduh ka 13 tarik, Naitung, 2023 tad haduh ban da pynbna da kumwei pat.
Ki dukan die jingbam kiba shah teh ha kane ka hukum ki long naduh Hotel Assembly Point haduh Wards Lake lyngba ka surok Oakland, ka iew Polo baroh kawei, ka Urkaliar, ka Quinton Road, naduh Eee Cee Restaurant haduh Jail Road Petrol Pump.
Kino kino kiba pynkhein ïa kane ka hukum kin shah pynshitom hapoh ki kyndon jong ka Section 188 jong ka Indian Penal Code (IPC).
