Shillong, Naitung, 13: U Myntri Rangbah ka Jylla u Conrad K. Sangma ha ka sngi Palei u la pynkup burom ïa ki khynnah skul kiba la wan shakhmat ha ka eksamin ba la pynlong da ka Meghalaya Board of School Education (MBoSE) ha ka ‘Meghalaya Education Symposium’ ryngkat ka jingsakhi jong u Myntri ka tnat Pule Puthi u Rakkam A. Sangma ha ka jingïalang kaba la long ha Shillong International Centre for Performing Arts and Culture (SICPAC).
Ka ‘Meghalaya Education Symposium’ ka dei ka sienjam jong ka Sorkar Meghalaya ban kyntiew ïa ki jaka pule puthi bad ha kane ka prokram la ïashim bynta lang da ki Myntri Sorkar kiba kynthup ïa ka Dr. Mazel Ampareen Lyngdoh bad u Bah Paul Lyngdoh, u nongai buit jong ka tnat Pule Puthi u Bah H. M. Shangpliang, u Commissioner & Secretary ka tnat Pule Puthi u Pravin Bakshi bad kiwei kiwei.
U Myntri Rangbah haba kren ha kane ka jingïalang u la ong ba kane ka rynsan ka long ban ïamir jingmut halor ki jingkylla kiba kongsan ïa kiba ka Sorkar ka la shim ha kaba ïadei bad ka jingtreikam jong ka tnat Pule Puthi.
“Ngi la ïoh ïa ka jingkyrkhu lyngba ki samla pule kiba dei ban ïoh ïa ka kabu kaba bha tam, kata ym tang ha kaba ïadei bad ka jingpynkhlaiñ ïa ka thymmei jong ka pule puthi bad ban kyntiew ïa ka jinglong jingman jong ki ha baroh ki liang,” u la ong.
“Ngi la thaw ïa ka Youth Policy ka ban aibor ïa ki samla bad ka Sorkar ka la shim ïa ki sienjam ban kyntiew kumba 2000 tylli ki skul Lower bad Upper Primary.Kumjuh da kaba mang pisa T. 920 klur ban tei ïa ki 39 tylli ki Eklavya Model Residential Schools (EMRS) kum shibynta ban kyntiew ïa ka pule puthi,” u la ong.
“Da kaba mang na ka bynta khyndai tylli ki kolej ha baroh kawei ka jylla kan pynthikna ba ki samla kin ïoh ïa ka pule puthi kaba biang ha ki thain nongkyndong, ka jingpynïoh ïa kajuh ka kabu na ka bynta baroh. Ha ka jingpyrshang ban kyntiew ïa ka pule puthi lyngba ka Digital, ngi la sam kumba 26,000 tylli ki Digital Tablet sha ki samla khynnah skul na ka bynta u snem 2021-22,” la bynrap u Sangma.
“Na ka liang ka Sorkar ka angnud ban kynthup ïa ki jingai jingmut bad ki jingmynjur lyngba ka jingpynlong ïa ka ‘education symposium’ ban ïai bteng ban kyntiew ha ka liang ki jingpule kiba kham shalor. Nga ai khublei ïa ki samla kiba stad kiba wan shakhmat ha ki eksamin ba la pynlong da ka Meghalaya Board of School Education,” la bynrap u Sangma.
U Myntri ka tnat Pule Puthi u Rakkam A. Sangma haba kren hashwa, u la ong, ka Sorkar Meghalaya ka la phaikhmat halor ki kam pynroi bad kum ka jylla ka la ïaid ha u mawjam uba kham shakhmat. Lyngba ki jingthmu jong kane ka thong ban kyntiew shakhmat ïa ka jylla shibun ki sienjam la lah ban shim, kata kum ha kaba wanrah ïa ki University, ka jingplie ïa kiba bun tylli ki kolej bad ka jingpynbha ïa kiba bun ki iingskul kiba la rim.
Ka Myntri ka tnat ka Koit ka Khiah ka Dr. Mazel Ampareen Lyngdoh, ka la pynpaw ïa ka jingdonkam ban kyntiew ha ki bynta bapher bapher ha ka liang ka pule puthi.
“Nga sngewkmen shibun ban ïoh ïa ka kabu ban ieng na ka bynta ka lawei ka jylla jong ngi bad ban pynpaw ïa ka jingsngew sarong halor ka jinglah ka jong ki ka ban pynurlong ruh ïa ka jingasngnud bad ka jingkyrmen ka jong ngi. Ka long kaba donkam ba ka jingtreikam ha ka liang ka pule puthi ka jong ngi kan kyntiew ïa ki samla pule yki tang ha ka liang k jingpule hynrei ruh ban pynpaw ïa ki sap ki phong ki jong ki khnang ba kin lah ban ïa aireng ha kane ka pyrthei jong ka jingïaleh. Ka pule puthi ka dei ka thong ban wanrah ka jingkylla ïa ka lawei jong ka jylla Meghalaya. Ngi khmih shakhmat ban ïatreilang na ka bynta ban kyntiew bad pynbha shuh shuh ha ka liang ka pule puthi ha ka jylla ka jong ngi.”
Ka “Meghalaya Education Symposium 2023” ka la long kum ka rynsan kaba don jingmut na ka bynta ban ïamir jingmut lang ha ryngkat ka jingïatreilang hapdeng ki nongïalam, ki riew shemphang ha ka liang ka pule puthi nalor ki kynhun kiba ïa don bynta. Kane ka plielad ruh ban ïamir jingmut halor ki jingshem bad ki sienjam ban kyntiew ïa ka pule puthi ha ka jylla Meghalaya.
