Phah jingthoh ka UDP sha ka Commission Da kawei ka jingthoh yn phah ki 3 ADC sha ka Law Commission ban pyrshah UCC

Shillong, Naitung 13 : Baroh lai tylli ki District Council jong ka jylla, kata ka KHADC, JHADC bad ruh ka GHADC ki la shim ïa ka rai ban phah tang kawei ka jingthoh sha ka National Law Commission ban pyrshah jur ïa ka jingthmu pyntreikam ïa ka Uniform Civil Code (UCC) ha baroh kawei ka Ri.
Ïa katei ka rai (Resolution) kitei ki lai District Council ki la shim ha ka jingïalang kaba long hynin ka sngi ha conference hall jong ka KHADC ha Shillong.
“Ngin phah da ka Resolution ba la ïa soi lang da baroh lai tylli ki District Council ha shwa ka 14tarik sha ka National Law Commission ban pyntip ba ngi baroh ryngkat ki nongshong shnong ngi pyrshah jur ïa ka UCC,” ong u CEM ka KHADC, Bah Pynïaid Sing Syiem haba kren bad ki lad pathai khubor.
U CEM u ong ruh ba ha katei ka jingthoh, kin kdew ruh ba kiei ki nongrim ba ki Council ki don ban pynpaw ba ki ieng pyrshah ïa ka jingthmu pyntreikam ïa ka UCC bad ba kumno katei ka aiñ kan ktah ïa ka riti dustur bad ka jinglong tynrai lada ka ïoh ban treikam.
U CEM ka JHADC, Ma Thombor Shiwat u la ong ba katei ka jingmih jong ki ban pyrshah kam dei ba ki shu pyrshah kumto hynrei kadei halor ka nongrim bad ka bor kaba la pynkup ïa ki da ka Khyrnit kaba Hynriew. “Kumta da ka jingïasngewthuh lang ngin ïa soi lang bad pynpaw ïa ka jingpyrshah,” u la ong.
Haba bynrap lang, u Chairman ka High Power Committee ka GHADC u RK Sangma u la ïathuh ba ka Council ka la dep ban pynlong bun ki jingïalang bad ki kynhun bapher bapher kynthup ïa ki Nokma bad bad ruh ki riew rangbah ka thaiñ ban ïa kren halor katei ka bynta.
“Ngi don hangne ban pyntylli ïa ka sur ban pyrshah jur ïa ka,” u la ong.
Ha kajuh ka por na ka liang ka UDP ruh ka la rai ban pyrshah jur ïa jingthmu pyntreikam ïa ka Uniform Civil Code da kaba ong ba katei kan ktah jur ïa ka riti dustur tynrai jong ka jaidbynriew riewlum jong ka jylla.
Ha ka shithi sha u Member Secretary ka Law Commission of India, u General Secretary ka UDP Dr. Jemino Mawthoh u la ong na ka daw ba kam don jingshai halor katei ka bynta, kumta na ka liang ka party ki la rai ban kyrshan ïa katei ka jingpyntreikam ïa ka UCC.”
Shuh shuh u la ong ruh ba ka party ka tip ruh ba katei kadei ka mat kaba kongsan bha kaba la kylla long ka mat ïatai kaba jur bha ha kylleng ka ri.