Ka NPP ka buh shwa ïa u paidbah hakhmat, ïa ka shuki ne ka bor hadien : Sniawbhalang Dhar

Shillong Naitung 1: U Symbud Myntri Rangbah ka jylla u Ma Sniawbhalang Dhar, ha ka Sngi Balang, ula ong ba ka sorkar kaba la ïalam da ka seng NPP ka dei ka Sorkar kaba buh ïa u paidbah ha khmat bad ïa ka shuki ne ka bor hadien. Namar ka dei ka sorkar kaba peit ïa ka khia ka shon u paidbah kumta kam don por ban peit ïa ki jingkynthoh namar ka pynleit jingmut ha ki kam pynroi. U la pynpaw ruh ba palat 15,000 klur tygnka ki projek ki dei kiba dang ïaid ka jingtrei mynta ha New Shillong Township (NST).
Ula kren ïa katei ha ka jingïalang pynkup burom kaba la pynlong da ka Joint Action Committee ban ai khublei ïa ka Sorkar Jylla halor ka One Time Settlement (OTS) Scheme na ka bynta ki kali kamai.
“Kum ki nongïalam ki jong phi, ngim sngew ei ei wat lada ki paidbah ki kynthoh jur ïa ngi ha ki rynsan social media ne ha kiwei kiwei ki lad. Ngi don hangne ban shakri ïa phi. Ka sorkar kaba ïalam da ka NPP ka dei ka sorkar jong u paidbah” ong u Ma Sniawbha.
“Ki don bun bha kiba kren sniew pyrshah ïa ka sorkar, hynrei ngi ngim don por ban sngap ïa kitei baroh. Ngi bunkam ban trei na ka bynta ki paidbah jong ka jylla. Ai ba kin kren katba ki sngew kwah ban kren, hynrei ngi don hangne ban trei na ka bynta ki paitbah bad ym ban sngap ïa ki jingkren ki bym don nongrim suda” ula bynrap.
U Ma Sniawbha ula ong, ba ka sorkar ka ïeng ban pynleit jingmut ha ka ban ai ka jingshakri ha baroh ki liang.
“Peit ïa ki kam kiba la leh da ka sorkar NPP ha kine ki 8 snem kiba la leit. Kaei kaba ngim shym la leh? Lada ngi ïakren shaphang ka jingshna ïa ki surok, koit ka khiah, ka bording elektrik, pule puthi bad ha jan baroh ki tnad sorkar, ka jingsam ïa ki kam pynroi ka la long kaba mar katjuh” ula ong.
Haba pynpaw ïa ka jingïaid ki kam ha New Shillong Township, ula ong, “Ngi dang tei ïa ka Administrative City bad ïa ka Knowledge City ha New Shillong Township. Mynta la bun snem, ngi lah ïai bteng ban ïakren halor ka New Shillong Township hynrei kam shym la jia eiei pat. Ngam mut pat ban ong, ba ki sorkar kiba la dep kim shym la treikam, hynrei ka sorkar hapoh ka jingïalam ka NPP, khie leit sha New Shillong bad phin sa ïohi ïa ki jingkylla kiba la sdang ban jia bad ïaid shakhmat mynta”.
“Palat ïa ka 15,000 Klur tyngka jong ki projek ki dei kiba dang ïaid ka jingtrei mynta katba nga dang kren. La shna ïa ki State Highways ha kine ki 8 snem kiba la dep” ong u Ma Sniawbha. Ha kaba ïadei bad ka OTS scheme, ula ong ba ka sorkar ka la shim khia ban kyrshan ïa ki paidbah kiba don hapdeng jong ka jingeh.
“Haba phi mad ïa ka jingeh kaba kum kane, ka dei ka kamram jong ka sorkar ban ïarap ïa ki briew jongka. Kumta ngi lah pyntreikam ïa kane ka scheme bad ngi kyrmen ba kan pynmih ïa kiei kiei kiba bha. Shim ïa kane ka kabu kaba phi ïoh” ula ong.
U Ma Sniawbha ula ong ba ka sorkar ka dang khmih bniah ruh ïa ki jingsngewkhia kiba la pynpaw da ki briew kiba ïadon bynta ha ka liang ka jingpynkit ïa ki mar ki mata.
“Ka la don ruh ka jingdawa ha kaba ïadei bad ki kali ki bym don ïa ki kot ki sla kiba biang. Ngi dang khmih bniah ïa kane ka mat. Ki lah kyrpad ban shim khia lem na ka bynta ki kali ki bym don ïa ki kot ki sla bad nga lah ong ïa ki ba ngin sa khmih bniah ïa kane ka mat” ula ong.
Ula kyrpad ïa ka ban ai ka jingïatreilang bad ki ophisar bad ban jur ïa ka jingkongsan jong ki nongniah trok. Nga sngewthuh ïa kane ka mat bad nga kyntu ïa phi ban ïatreilang bad ki ophisar ki jong ngi. Kaei kaba ngi lah ban leh ngin leh beit bad ngi donkam ïa ka jingïatreilang khnang ba ka kam kan ïaid beit ïaid ryntih” ong u Ma Sniawbha
“Ki nongniah trok ki long kiba kongsan bha ïa ka jylla. Khlem ma phi, ka jylla jong ngi kan ym lah ban kiew. Khlem ka Trucker Associations, ngi ngin ym lah ban pyndap pynbiang ïa ka jingdonkam jong ka jylla bad ki paidbah” ula ong.
Da kaba ïada ïa u Symbud Myntri Rangbah ka Jylla u Bah Prestone Tynsong halor ka jingshah kynthoh ha ki rynsan social media, u Sniawbha ula ong, “U Symbud Myntri Rangbah ka Jylla u Bah Prestone Tynsong u long uba kloi ban ai ka kti jingïarap. Um ju ong em hynrei wat hapdeng jong katei, u shah kynthoh ha ki rynsan social media.”
Haba ïeng skhem halor ka jingshim khia ka sorkar ïa ki mat kiba kongsan, ula ong, “Ki nongïalam ka NPP ki la buh shwa hakhmat eh ïa ki paidbah ym ïa ka bor. Kane ka sorkar kaba ïalam da ka NPP hapoh ka jingïalam u Myntri Rangbah u Conrad K Sangma. Phi lah ïohi kumno ka jylla ka la iaid shaphrang ha kine ki 8 snem kiba la dep. Ngi lah ïaid ha ka lynti kaba dei. Ai ba ki paitbah kin kren kat kaba ki sngew kwah ban kren, hynrei ngi ngin ym ïapeiñ pat ba kan ktah ïa ka bha ka miat jong ki paidbah” ula bynrap.
Ha katei ka prokram, ki nongpynïaid ki la pynkup burom ïa u Myntri Rangbah ka jylla u Conrad K Sangma ryngkat bad ïa ki Symbud Myntri Rangbah ka jylla u Bah Prestone Tynsong bad Ma Sniawbhalang Dhar ha ka ban ai jingithuh ïa ka kamram kaba ki la leh na ka bynta ka jingpynytreikam ïa ka OTS scheme.