Ba pyntreikam ïa ka skim OTS pynkup burom kyrpang ka JAC ïa u CM bad ki Dy. CM

Shillong, Naitung 01 : U Myntri Rangbah ka jylla, u Conrad K. Sangma, u la ong ba ka jingjop jong kano kano ka Sorkar kam shong tang ha ka jingpyntrei ïa ki projek kam pynroi, hynrei ka dei ban paw ha ka jinglah ban pynbha ïa ka jingim jong ki paidbah.
Ïa kane u la kren ha ka prokram ai jingïaroh ba la pynlong da ka Joint Action Committee ha ka nongbah ban ai khublei ïa ka Sorkar jylla halor ka jingpyntreikam ïa ka One-Time Settlement (OTS) Scheme na ka bynta ki kali kamai.
Ha kane ka jingïalang, la pynkup burom kyrpang ïa u Myntri Rangbah Conrad K Sangma ryngkat ïa ki Symbud Myntri Rangbah, Bah Prestone Tynsong bad Bah Sniawbhalang Dhar namar ka jinglah jong ki ban pyntreikam ïa katei ka skhim.
U Conrad u la ong ba bunsien ki nongmihkhmat paidbah ki ju shah kynthoh haba kim lah ban pynurlong ïa ki jingkhmih lynti jong ki paidbah, hynrei haba ki lah ban wanrah jingïarap bad pynbeit ïa ki jingeh, ka jingïaroh ka ju long kaba duna.
“Haba mih ki jingeh, ki nongmihkhmat paidbah ki ju shah kynnoh. Hynrei haba lah ban pynbeit ïa ki jingeh kam ju don satia ka jingsngewnguh. Kumta kane ka jingpyndon burom ka long kaba ai mynsiem shibun ïa ngi,” la ong u Myntri Rangbah.
Haba kren halor ka OTS Scheme, u Myntri Rangbah u la ïathuh ba ka Sorkar ka la shim ïa ka rai kaba eh ban map noh ïa ka khajna kali kaba kot hapdeng 850 klur haduh 1,000 klur, da kaba buh hakhmat ïa ka jingmyntoi jong ki hajar tylli ki longïing kiba shaniah ha ka kam kali kamai.
U la ong ba watla katei ka pisa ka lah ban pyndonkam ha kiwei pat ki kam pynroi, hynrei ka Sorkar ka la shim ïa kane ka rai namar ba kumba 16,000 ngut ki nongñiah trok bad ki longïing jong ki, kiba kot haduh 2 lak ngut ki briew, kin ïoh jingïarap na katei ka skhim.
“Kam shym la long ka rai kaba suk, hynrei ngi la shim ïa ka da kaba buh hakhmat ïa ka jingbha jong ki paidbah bad ka jingim jong ki longïing kiba shah ktah,” u la ong.
Haba jubab ïa ki jingkynnoh ba ka Sorkar ka pynleit jingmut tang ha ki project kiba heh, u Conrad u la ong ba katei ka jingïohi ka dei kaba shu peit tang shi bynta ïa ka kam jong ka Sorkar.
U la kdew ba nalor ka jingtei ïa ki jingdon jingem, ka Sorkar ka la shim ruh ïa bun ki sienjam ban pynbeit ïa ki jingeh ba la slem jong ki nonghikai, ban kyrshan ïa ki nongrep bad ban pynkhlaiñ ïa ki nongsengkam sengjam.
U Myntri Rangbah u la ong ba ka jylla ka donkam lang ïa ki projek kam pynroi kiba heh bad ki polisi kiba ktah beit ïa ka jingim jong u paidbah.
“Ki project kiba heh ki pyni ba ka Meghalaya ka la khreh ban kiew shaphrang. Hynrei ka jingjop kaba shisha ka shong ha ka jinglah jong kine ki sienjam ban pynbha ïa ka jingim ba man ka sngi jong ki paidbah,” u la ong.
U Conrad u la ai jingïaroh ruh ïa u Symbud Myntri Rangbah halor ka jingïalam jong u ban wad ïa ka jingïarap na ka bynta ki nongñiah kali kamai bad ban wanrah ïa ka jingtyrwa jong ka OTS Scheme.
U la ban jur ba ka roi ka par kam dei tang ka jingtei ïa ki surok, ki ïing sorkar ne ki stadium, hynrei kaba kham kongsan hi ka dei ban long kaba ktah beit ïa ka jingim jong u paidbah.
“Ka roi ka par kaba shisha ka dei kaba wanrah jingkylla ha ka jingim jong ki briew. Man ka polisi bad man ka rai kaba ngi shim ka dei ban ai jingmyntoi ïa ki paidbah. Kane ka dei ka nongrim jong ka synshar khadar kaba bha,” u la ong.
Shuh shuh u la ong, “Ngim kam ba ngi long kiba biang lut. Hynrei ngi la kut jingmut ban nang pynjanai ïa ka rukom treikam bad ban buh ïa u paidbah hapdeng eh jong baroh ki rai. Da ka jingïatreilang bad ka jingkyrshan jong ki paidbah, ngin dang ïai kyntiew ïa ka Meghalaya,” la pynkut u Conrad Sangma.