Ka ‘Nongstoiñ Youth Calesthenic’ ka kynhun ki samla kilan met

0

Nongstoiñ, Jymmang 9: Kum shi bynta ban khring ïa ki samla ba kin lait na ki jingmlien kiba sniew, ki khun samla jong ka shnong New Nongstoiñ ki la mih madan ban seng ïa ki kam jingïalehkai kilan met kaba la tip kum ka Nongstoiñ Youth Calesthenic.
Kitei ki samla ki dei na ka kyntoid Mawlarshong jong ka shnong New Nongstoiñ. La ong ba namar bym don jaka ïalehkai ba biang, ki ju pynlong parakhynnah ban ïalehkai ha rud wah ka Nondeiñ. Ym tang ba ki ïalehkai ha katei ka rud wah, hynrei ki peitngor ruh ïa katei ka wah, namar don kiba leit ban leh jaboh kumjuh kiba pyrshang ban shoh dawai ïa ki dohum doh wah.
Haba ïakren bad u samla Aiborlang Marshillong President bad Banskhemlang Syiemlieh Secretary jong ka Nongstoiñ Youth Calesthenic, ki la pynpaw ba ki la sdang ïalehkai ïa katei ka jinglehkai naduh u snem 2020, ha ka por ba wan lyngshop ka khlam Corona.
“Mynta ka kynti ngin pynlong ruh ïa ka jingïakop ban ïalehkai ïa katei ka “Calesthenic”, kaba ngi ai kyrteng ka “Street Workout Calesthenic Battle Meet Up Contest”. Ngi da wer ruh ïa ki para samla jong ka thaiñ Nongstoiñ ban ïashimbynta lang ha katei ka jingïalehkai khlem da donkam ban siew bai rung. Ka por kan long naduh ka 1 baje shiteng nohphai sngi haduh ka por 5 baje janmied ha ka 13 tarik sngi saitjaiñ mynta u bnai Jymmang 2023 bad kan don ruh ka jingai ïa ki Khusnam”, ong u samla Aiborlang Marshillong.
Kitei ki khynnah samla ki la pynpaw ruh ïa ka jingkyrpad ïa kino kino kiba lah ban noh synñiang lem ïa katei ka seng jong ki. Namar ha katei ka jaka ba long harud wah, lada wan u slap ka ju dap um bad kim lah shuh ban ïoh ïalehkai. Ki ong ruh ba ki don ka jingkyrmen ba ha kawei ka sngi katei ka jingïalehkai ruh kan long lang kum kiwei kiwei pat ki lympung.

Leave A Reply

Your email address will not be published.