Ka Lapangap kam dei ka jaka ïakajia pud yn rah ha ka jingïakren ki ar CM: Dy. CM

Shillong, Nailar 29 : U Symbud Myntri Rangbah ka Jylla uba dei ruh u Chairman ka Regional Committee ka Jaintia Hills, u Ma Sniawbhalang Dhar ula pyntip ba ka shnong Lapangap ha West Jaintia Hills, kam dei ka Shnong kaba hap hapoh ki jaka ba ïakajia pud hapdeng ka Meghalaya bad Assam .
Haba ïakren bad ki nongthoh khubor mynta ka Sngi Thohdieng, u Ma Sniawbha ula pyntip ba ka Sorkar Jylla ka la phah shuh shuh ïa ki bor Pulit ban ai jingïada ïa ka thaiñ Lapangap, kaba don hapdeng ka jingïakynad hapdeng ki paid Khasi-Pnar bad ki Karbi la katto katne sngi.
Lah ban kdew ba ki paid Khasi-Pnar bad ki Karbi ki la ïaleh thma siat jri bad khnam ryntieh haduh laisngi lynter naduh ka sngi Ba-ar halor ka jingïakam trai ïa ka jaka ha Lapangap.
Hynnin ka sngi, ki Deputy Commissioner ka West Jaintia Hills bad West Karbi Anglong District ki la ïashong jingïalang ba kyrkieh ban tem noh ïa kane ka jingïakynad.
Haba kren halor kane ka jingïalang, u Symbud Myntri Rangbah ula ong ba ka Sorkar Jylla ka dang ap mynta ïa ka kaiphod na u DC ka West Jaintia Hills, ïa kaba u Myntri Rangbah ka Jylla Conrad K Sangma un sa rah ïa kane ka kam ban ïakren bad u Myntri Rangbah ka Assam ha ka jingïalang ka ban long lashai ka sngi Saitjain ha Guwahati.
U Symbud Myntri Rangbah u pyntip ba ïa mynta kam shym la don shuh ka jingïakynad ha Lapangap bad ki bor District ki la peit pyrman bha ïa ka jinglong jingman ha ka thaiñ.