Ka kynhun tohkit ka dei ban kthong ïa u Kingpin ba pynïaid thok ïa ka IRS Call Centre: Mukul

By Mawphor News Desk On Sep 21, 2023

Shillong, Nailur, 20: U MLA jong ka All India Trinamool Congress u Mukul Sangma uba long ruh u Myntri Rangbah barim jong ka Jylla ha ka sngi Balang u la ong ba ka kynhun tohkit ka la dei ban kthong ïa u “kingpin” uba donkti ban pynïaid thok ïa ka US’ Internal Revenue Service (IRS) Call Centre.
Ïa kane ka jingleh thok la khynra da ki Pulit jong ka Jylla ha u snem 2017 halor ka jingpynngop ïa ki briew kiba nabar ri kynthup ruh ïa ki nongshong shnong jong ka ri United States bad na UK.
Ïa kane ka lap hadien ka jingkhynra ïa ka IFA Enterprise Call Centre, kaba treikam na SS NetCom, Dhankheti, Shillong.
“Ka kynhun tohkit ka dei ban kthong ïa ki,” ong u Sangma ha ka jingïakren bad ki lad pathai khubor.
Da kaba pynpaw ba ki don bun syrtap ki jingïakren, u Sangma u la ong, “ka jingïakren kaba nyngkong, ka kren shaphang ka jingtip ha ka Data bad ka jingïakren kaba ai ka la kdat noh sha kawei ka syrtap hadien kawei pat. Ka kam bymman kaba khatduh eh ka la jia ha ka syrtap kaba khatduh. Phi la tip mynta ïa ka rukom treikam jong kane ka kynhun Mafia, kaba treikam ha baroh kawei ka pyrthei. Ka dei ka kynhun runar kaba don bynta sha baroh kawei ka pyrthei kaba donkti halor kane.”
“Namarkata, kano kano ka kynhun tohkit ka dei ban tih bniah naduh tynrai tang lada ki ïoh ïa ka jingïatreilang bad ki bor ka aiñ jong kane ka jylla, ki kynhun tohkit, na ka ri bad nabar ri bad kin sa lah ban kyndang bad ban tip ruh mano ba dei u Kingpin,”: u la ong.
Haba kylli, u Sangma u la ong, “ka don ka daw balei nga pynpaw ka jingsngewkhia bad phi tip kaei kaba jia halor kane ka case? Hato ïa kane ka case la tohkit bniah neem ha ka rukom kaba dei da ka jingïatreilang namar ban tohkit bniah naduh tynrai ka kynhun tohkit ka dongkam ruh ban leh wat ïa ka Forensic.”
“Ka donkam ïa ki kynhun tohkit na ka jylla, ka bor jong ka jylla, bad ban pan jingïarap na ka tnat pulit. Hato ki la pan jingïarap? Hato ki la kylli? Kine ki dei ki jingkylli ba phi lah ban kylli na ki bor bahalor,” u la bynrap.