Nongstoiñ, Nailur 20: Bun tylli ki Ïing ki la orpait bad pei thliew ki tnum na ka jingwan hap ki maw ba kynnoh pynbthei bomb khlem akor jong ki Nongshna surok National Highway ka NHIDCL kaba dang ïaid shaid shaid mynta na Nongstoiñ sha Rambrai.
Kane ka la jïa ïa ki longïing kiba dei na ka shnong Steplanglur, kawei na ki shnong kaba don ha lynti sha Rambrai. Ka jingorpait ki jingtei bad jingpei thliew ki tnum ka la jia ruh ïa kawei ka skul bala tip kum ka Jurïawthei Presbyterian Lower Primary School Steplanglur Balang Presbyterian Mawlieh.
Ki longïing kiba la mad ïa kane ka apot ki kynthup ïa ka Ïing u Bah Teiborlin Nongsiej, Bah Kloilan Syiemlieh, bah Briplingstar Kharbani, kong Bistiful Nongsiej, kong Listiful Nongsiej, kong Wandarisha Nongsiej bad kiwei kiwei.
U Nongthoh khubor haba ïakren bad kine ki lanot, ki la pyntip ba hadien kane ka jingjia, ki la leit ban ïakren bad ki nongtrei jong ka kompani ba pynshna ïa ka surok, hynrei la kynnoh ba kine ki nongtrei ki la leh bym patiaw bad ong pynban ba kin leit ujor sha ki bor District.
U Sordar ka Shnong Steplanglur Bah Syntarning Wanniang u la ong ba kane ka kompani ka la pynkheiñ ïa ki kyndon jingbthah haba pynbthei bomb. Kane ka jingpynbthei bomb ka la jia bad sngi bad miet haduh ba ki khun Shynrang ka Shnong ki la kem bitar.
U la ong ba lada ki bor District kim tuklar mar mar ïa kane ka kam, khlem pep kane ka jingleh jong ka kompani ka lah ban lam sha ka jingjia kaba sngewsih. U la pynpaw ba ka bor Shnong kan ym lah ban teh lakam lada ka jingleh ka kompani ka la long shaba palat.
Kumjuh ruh u Headmaster ka Jurïawthei Presbyterian Lower Primary School, Steplanglur, Bah Rockefeller Nongsiej u la ong ba ka jingpynbthei bomb jong kane ka kompani ka la long shaba palat liam haduh ba ka ïing skul ka la julor bad ki lynti ïaid kjat ruh ki la duh noh.
U la ong ba ki khynnah skul mynta ki la hap ban shu par ïa ka riat ba la duh ka lynti ïaid kjat. U la ïathuh ba ki bor pynïaid ka skul ki la leit kyrpad ïa ka kompani ba shna surok, ba kan pynmaramot lang malu mala ïa ka lynti ïaid jong ki khynnah hynrei ïa kane ruh la leh bym patiaw.
Kaba ktah eh ka dei ka jingshah pynjor kawei ka pynthor kba jong kawei ka Longïing Khunswet kaba la long rangbah tang da ka samla kaba khmih bad sumar haduh 6 ngut ki para. Ka jingjulor jong kane ka pynthor ka dei namar ka jingpyntuid khyndew khlem akor jong ka kompani.
