Nongstoiñ, Nailur 20: Ka jingpang khmat ka la sdang ban pur sted bha ha kylleng ki jaka ha West Khasi Hills ha kaba bun bah ki nongshong shnong ki la ngat bad shah ktah ha katei ka jingpang. La ïoh jingtip ba katei ka jingpang khmat ka la sdang ban kynrei ha ki thaiñ Mawdoh jong ka Rambrai bad ha kiwei pat ki shnong ha katei ka thaiñ.
Ha kine ki sngi ba la dep u bah Jiedstarland Lyngkhoi u ba dei na ki thaiñ Rambrai haba pyntip ha u nongthoh khubor, u la ong ban katei ka jingpang khmat ka la ktah ïa u ruh. Nalor kata la lap ruh ba ki don kiwei pat ki nongshong shnong kiba la shah ktah ha katei ka jingpang khmat, ha kaba uwei u rangbah u la ong ba ha ka shnong jong u ruh la bun ngut bha kiba ngat ha katei ka jingpang khmat.
Hadien ba u la ïoh jingtip ba katei ka jingpang khmat ka la sdang pur, kumta ban ïada na katei ka jingpang u la phah deng da ki ksai byrni ïa baroh ki khun bad ïalade ruh u la deng da ki juh ki ksai byrni. Haba kylli pat ba hato lada deng da ki ksai byrni katei ka jingpang khmat kam ktah shuh, u la ong ba u shu ngeit ba kan ym ktah shuh namar ki riew tymmen mynshuwa ki shait ïathuh bad ong kumta
Nalor katei ka jingpang khmat ka don sa kawei pat ka jingpang ha kine ki sngi kaba ki ju khot ka ‘ñiangmiang, kaba kham ktah bha ïa ki khynnah kiba lai snem haduh shiphew snem ka karta.
Haba katei ka jingpang ka ngat ha ki khynnah ki ngap ki at na ki bynta jong ki tyllong shkor bad ki at kum ki glan bad ki khynnah ki shitom bha ban bam. Don kiba kham jur lei lei ka shim por haduh ar sngi ei ei ba ki lah ban ang ïa ka shyntur ban bam. Wat la katei ka jingpang ka don ruh kam da ktah than haduh ba ki khynnah kin da thiah, hynrei ki shu shitom ban bam bad haba phah sumar ruh ka kham suk ban pynkoit.
