Ka jylla ka don ki Samla kiba lah ban jop ïa ki eksam UPSC yn ai jingkyrshan lyngba ka CM-Inspire : Conrad

Shillong, Nailar 12 : U Myntri Rangbah ka Jylla Conrad K Sangma ha ka sngi Balang ula ong ba ka Meghalaya ka don ki khun samla kiba don la ka sap ban mih kum ki kyrtong ki ban jop ne pass ïa ki comptetitive eksam ka UPSC bad kiwei kiwei, hynrei ka donkam ban tei ïa ka rukom treikam kaba khlaiñ ban btin lynti, ai jinghikai, kyrshan pisa bad ki nongai jinghikai (mentorship), ban ïarap ïa ki samla ba kin sei ïa ka sap ba pura jong ki.
Haba kren ha ka ‘Ascent 2026’, ka seminar ba la pynlong da ka Meghalaya Administrative Training Institute (MATI) ha la ka jong ka campus ha Mawdiangdiang, Shillong, u Myntri Rangbah ula ong ba ka CM-Inspire prokram ka Sorkar ka dei kaba la pynwan dur ban thaw ïa kum kine ki rukom treikam ki ban lah sei ïa ka sap jong ki samla ka jylla.
Ula ong ba ka Meghalaya ka la dei ban sei ïa bun bun ngut ki kyrtong kiba pass ïa ka UPSC bad kiwei ki competitive eksam ka ri namar “kam kyrduh satia ïa ki khun samla ba don sap” hapoh ka Jylla.
“Ka jingeh ka shong ha ka jingai ïa kata ka rukom treikam, ban wanrah lang ïa ki kynhun ba don bynta, wanrah ïa ka jinglong jingman kaba dei, btin lynti ïa ki samla pule jong ngi ha ka lynti kaba dei, bad ïarap ïa ki ba kin kynjoh ïa ka thong dalade bad ruh ïa ka thong na ka bynta jong ngi kum ka Jylla” ula ong.
U Conrad ula nujor ïa ka CM-Inspire bad ka STAR prokram jong ka Sorkar, kaba la pyllait san snem mynshuwa da ka Tnad ïalehkai ka Jylla.
Hapoh ka STAR, ka Sorkar ka la leit sha man ki shnong bad khmih bniah ïa jan 30,000 ngut ki samla, katto katne ki dei ki bym pat ju phong ïa ki juti mareh lane leit sha ki jaka test ïa ka jinglah ïalehkai jong ki. Ka prokram ka la lah ban ithuh haduh 10 ngut ki nongïalehkai ïa kaba u Conrad ula ong ba ki dei ki “Super Athlete”- napdeng ki top1% jong ki sap ka pyrthei.
ïa kine ki nongïalehkai ba jied la wan ïalam sha Shillong bad la pynbiang ïa ki da ki jingpule, bam tei met, jingïasyllok ban pynkhlaiñ ïa ka bor pyrkhat, physiotherapy, kilan met bad ai jinghikai.
“Ka prokram kala phah ruh ïa ki sha ki Centre of Execellence kiba don hapoh ka ri bad shabar ri ba kin leit pyntbit kyrpang. Ka thong jong ka Sorkar ka long ba iwei na kine ki nongïalehkai kin ioh khur ia ka Olympic medal ha u 2036” ong u Conrad.
U ong ba kum kane ka sienjam ban ithuh ïa ki sap, buh ïa ka thong bad tei ïa ki lynti ai jingkyrshan ba donkam, ki dei kiba la pyndonkam lang ha ki competitive eksam lyngba ka CM-Inspire.
Ha kane ka prokram, u Myntri Rangbah bad kiwei ki kynrem ki lyndan ki la sam ïa ki cheque CM-Inspire ba mar 50,000 tyngka sha ki 7 ngut ki kyrtong kiba la pass ïa ka UPSC Civil Services Preliminary Examination.
Ha u Conrad, ka thong ba kham heh ka ïar palat ban ïa ka jingpynbha ïa ka result jong kiba ïakhun ïa ka eksam UPSC na Meghalaya.
“Kam dei eh tang shaphang ka Meghalaya. Ngi kwah ba ki samla ka Meghalaya kin synniang sha ka jingtei ïa ka Ri” ula ong haba mutdur ïa ka lawei ba kin don mano re mano na ka Jylla ki ban long ki Home Secretary lane Cabinet Secretary jong ka Sorkar India.
U Conrad ula kdew ruh ba ki competitive eksam kam dei satia tang jong ka UPSC. “Kam dei eh tang ïa kawei ka eksam. Ki don kumba 20-30 tylli kum kine ki eksam. Ki don shibun kiei kiei kaba ki briew kim pat tip satia” ula ong hakhmat ki samla kiba kwah ban long ei ei ha ka jingim.
Haba pynkut, u Myntri Rangbah, ula pan ïa ki jingai jingmut bad ki jingpynsngew na ki paidbah ban lah pynajanai ïa ka CM-Inspire programme haba kubur ba ym don satia kaei kaei ruh kaba biang nadong shadong bad ka don beit ka jaka ban pynbha ïa ki.
U Myntri Rangbah ula plie paidbah ruh ïa ka Digital Learning Lab jong ka Meghalaya Administrative Training Institute ha kane ka jingïalang.