Pynshlur u Director jong ka JEC- Khliehriat ïa ki samla pule ban pyndonkam ïa ki bor technology bad ki AI

Khliehriat, Nailar 12 : U Director jong ka Jaiñtia Eastern College, Khliehriat, u Dr Phervision Nongtdu, haba kren kum u kongsan ha ka prokram ba ïadei bad ka International Youth Day 2026 ba la pynlong mynta ka sngi ha Jaiñtia Eastern College, Khliehriat u la ai mynisem bad pynshlur ïa ki samla pule ba ki dei ban pyndonkam hok ïa ki kor ki bor ka juk mynta lane ki techonology khamtam ban pyndonkam ïa ki Artificial Intelligence (A.I), u la ai khublei ïa ka ophis jong ka District Sports Office, (DSO) East Jaiñtia Hills District kaba la pynlong ïa kane ka prokram bad ai khublei ruh ïa baroh ki samla pule kiba la wan iashimbynta ha kane ka prokram.
U Kongsan u la kren shaphang ki kor ki bor ka juk mynta lane ka techology, namar ka phang pdang jong kane ka jingrakhe ïa ka sngi kyrpang ki samla ka International Youth Day 2026 ka ong “Youth Advancing Multilateral Cooperation through Technology and Partnership”, u kyntu ïa ki samla pule ba ki dei ban don ka jingiatreilang lane ka teamwork, ban pynsaphriang ïa ki jingtip sha kiwei kiwei ruh. Shuh shuh, u la kren halor ka jingdonkam ban pynneh pynsah ïa ka mariang bad bynrap da kaba ong “ ka jingnang jingstad da ki kor ki bor lane kata ka digital literacy bad ka skill development, ka long kaba donkam bha, ki samla ki dei ban long ki nongialam ban wanrah ïa ka jingkylla dur ïa ka mynta, ym ban ap ïa ka lashai, kumba ki riew khraw kum u Mahatma Gandhi bad u President barim jong ka U.S, u Barack Obama, ki ju pynshlur ïa ki samla ban iatreilang ha ka jingiatylli ban noh syniang sha ka imlang ka sahlang ban tei ïa ka ri ban long ka ri kaba khlaiñ”
U Dr P.Nongtfu u la ong ba baroh ki briew watla ki dei na ki jait ki kynja bapher bapher,watla pher ha ki riti ki dustur hynrei ki don kajuh ka bynta ha kaba ïadei bad ka pule puthi, ha ka suk ka kmen bad kajuh ka lawei ba phyrnai bad ong ruh ba ki kor ki bor lyngba ka technology ki iarap shibun ban tei ïa ki samla ba kin poi sha ka thong bad ruh ba kin noh syniang sha ka imlang ka sahlang.
Ïa kane ka prokram jong ki samla la pynphuh pynphieng shuh shuh da ki jingshad tynrai, jingrwai, ki jingkren ai mynsiem na ki samla, ki sur jingtem solo guiter bad kiwei kiwei ki jingpynbyrngia ba la ïa shimbynta da ki samla pule.
Kum shibynta jong ka prokram, la pynkup burom ïa ki samla pule kiba na East Jaiñtia Hills District kiba la mihkhmat na ka district, na ka jylla bad na ka ri ha ka National Level bad International Level, kiba la shah pynkup burom ki kynthup u samla John Khawbung bad ka Isa Chullet kiba la leit mihkhmat na ka jylla nad ka ri India ha ka International Youth Exchange Programme 2025 kaba la long ba Malaysia.
La pynkup burom ruh ia u samla Rishanki Langstang bad ka samla Wansakani Nongtdu kiba la leit mihkhmat na ka jylla ha ka International Youth Exchange Programme 2026 kaba la pynlong ha ri Philippines.
Kiba la ïa don ryngkat lang ha kane ka sngi, ki kynthup ka District Sports Officer (DSO) East Jaiñtia Hills District, ka kong S. M Rapsang, ki nonghikai, ki samla pule bad kiwei kiwei ki riew rangbah.