Shillong, Nailar 23: U Nongïalam ka All India Trinamool Congress (AITC) u Dr. Mukul Sangma ha ka sngi Thohdieng u la ong ba ka jingkitkhlieh ban thung ïa u nongïalam ba thymmai ka Liang Pyrshah ka shong beit ha u Lamphang ka ïing Dorbar Thaw Aiñ ka jylla.
Haba kylli la ka TMC kan thoh sha u Lamphang halor kane ka kam, u Mukul u la ong, “Ki don ki kam ba donkam ban pyrkhat kiba dei ha ka nongrim jong ki rukom leh hapoh ka ïing. Kumta ngam shem ïa kano kano ka jingartatien naba baroh ka jingkitkhlieh ka shong beit ha u Lamphang bad ka ophis jong u.”
Napdeng ki party kiba don ha ka liang pyrshah, ka TMC ka dei ka party kaba don bun ki MLA kata da 5 ngut, katba ka Congress kaba la don mynshwa 5 ngut ka la sah satang uwei hadien ba ki laingut ki MLA jong ka ki la pynïasoh noh sha ka seng kaba synshar ïa ka sorkar ka National People’s Party (NPP), katba u MLA ka Congress na Gambegre constituency, u Saleng A Sangma u la iehnoh kam kum u MLA ha u bnai Jylliew mynta u snem hadien ba u la shah jied kum u MP ka Lok Sabha na Tura Parliamentary constituency.
Katba ka Voice of the People Party (VPP) ka don kumba 4 ngut ki MLA.
