Nongstoiñ, Nailar 23: Hima Nongstoiñ Land Owners Coal Traders & Producers Association (HNLOCT&PA), kawei na ki seng kaba la slem bha hapoh West Khasi Hills District, kaba ju peit ju khmih ïa ka bit ka biang jong ki trai khyndew, trai par dewiong bad kiwei kiwei, ka pynpaw ka jingkmen hadien ba ka la ïohi lyngba ki lad pathai khubor ba ka sorkar kan khot ïa ka jingpynsngew paitbah (Public Hearing) na ka bynta ka jingsdang biang ïa ka jingtih dewiong.
“La shiphew tylli ki snem naduh ba ka NGT ka la khang ban tih dewiong ha u snem 2014 mki nongkhaïi, ki trai par dewiong ki nongbylla bapher bapher, ki iew ki hat hi baroh jong ka thaiñ Nongstoiñ, ki la don hapdeng ka jinghiran kaba shyrkhei bad ki jingeh ha baroh ki liang. Hynrei dei tang haduh mynta ka kynti ngi ïohi ba ka sorkar ka pyni ki kam ban sdang biang ban tih dewiong katkum ka jingstad saïan (Scientific Mining) kiba long katkum ka ka aiñ hapoh ka ri”.
“Halor ka jingkhot pynsngew paidbah (Public Hearing) ka ban long ha ka 27 tarik mynta u bnai ha Sdad Dkhar, West Khasi Hills District, ka Association khlem da pynslem ka la khot kyrkieh ïa ka jingïalang ha ka 12 Nailar ha ka jingïadon ryngkat lang ka HYC/FKJGP/WKHSU/HANM/MYF/UHM&WYF, kiba dei sengbhalang jong ka thaiñ Nongstoiñ kiba ju peit ïa ka bha ka miat jong ki paidbah na ka por sha ka por, ha kaba da kawei ka jingmut ngi la ïa rai ban ai ka jingkyrshan kaba pura ïa ka jingpynsngew paidbah jong ka sorkar”.
“Katkum ka jingsngewthuh ka long ka jingsdang biang ïa ka jingtih dewiong katkum ka jingstad saïan na ka bynta jingmyntoi ki paidbah ka dong ka thaiñ hi baroh kawei, khnang bka bylla ka sngi ka ïoh ka kot bad ka khajna jong ka jylla kan kiew arted na kawei ka por sha kawei ka pat”.
“Ka Association ryngkat ki sengbhalang ngi kyrpad ïa baroh ki dkhot bad baroh ki paidbah ka dong ka thaiñ, ba to ngin ïa snoh kti lang baroh ha kane ka kynti ba mynta, khnang ba kane ka khia ka shon ka jinghiran kaba shyrkhei, ki jingeh ha baroh ki liang kaba ngi la mad mynta la shiphew tylli ki snem, yn weng yn law noh da ka lynti jong ka aiñ da kaba ngin ai ka jingkyrshan kaba pura ïa katei ka jingpynsngew paidbah (Public Hearing), na ka bynta ban sdang biang ban tih dewiong katkum ka aiñ jong ka ri”, ong ka kyrwoh na u Bah M.Mawlot President ka Hima Nongstoiñ Land Owners Coal Traders & Producers Association.
