Shillong, Nailar 23: Ka tnat treikam pule puthi jong ka sorkar jylla Meghalaya lyngba ka Samagra Shiksha, ka la dep ban pynlong ïa ka SPARK prokram na bynta palat 2,600 ngut ki khynnah pule ha kylleng ka jylla. Lah sdang nyngkong ha ki katto katne tylli ki skul ha u bnai Ïaïong bad haduh kane ka sngi la lah ban pyndep ha 15 tylli ki skul ha baroh 12 tylli ki distrik.
Ka jingthmu jong ka SPARK (School Programmes in Articulation, Resilience and Kindness) ka long ban sam jinghikai hapdeng ki khynnah skul ha kaba ïadei bad ka jingshlur (confidence), ka rukom kren bad ïadei parabriew (communication and interpersonal skills), ka STEM (Science, Technology, Engineering & Mathematics) awareness bad ka jingbha jingmiat (wellbeing).
Ïa ka SPARK la plie pyrda ha u bnai Lber mynta u snem da u Swapnil Tembe, IAS, State Project Director, Samagra Shiksha jong ka sorkar Meghalaya. Ha ka jingkren jong u hapdeng ki khynnah nongïashim bynta ha kawei na ki skul, u la pynpaw ïa ka thong jong ka SPARK da kaba ong, “Phi don ïa la ka jong ka jong ka thong ha ka jingim jong phi. Kam pher lada phi jied kano kano ka lain jingpule lane jingtrei jingktah. Kaba donkam nyngkong kadei ka jingshlur bad jingngeit halade ba phi lah ban leh ïa ka. Kam dei kaba suk bad ka shim por ban pyntbit ïalade ha kane ka liang hynrei nga kmen ban ïohi ba phi la ïasdang ban kren, ban kylli jingkylli bad ban pyntbit ïalade ha ka rukom kren rukom khana.” U la ong shuh shuh, “Ban long kiba eh mynsiem haba ïakynduh ïa ki jingeh ka long kaba donkam namar kan ïarap ïa phi ba phin tur shaphrang khlem duh mynsiem. Bad ha ka jingïaid lynti jong phi, donkam ruh ban long ki briew kiba bha namar dei tang lyngba ka jinglehbha iwei ïa iwei ba ka pyrthei hi baroh kawei kan roi kan par. Ha ka rta jong phi, ka dei ka por bad ka ïa kaba dang biang eh baphin pyntbit ïalade ha kine ki liang.”
Ha ka 16 tarik u Nailar, la pynkupburom bad sam syrnot ïa palat 700 ngut ki khynnah pule ha 4 tylli ki skul hadien ka jingpyndep jong ki ïa ka prokram. Kine ki kynthup ïa 142 ngut na Ampati Government Higher Secondary School, Ampati bad 108 ngut na Chiringpara RMSA Secondary School, Chiringpara ha South West Garo Hills, 280 ngut na Government Girls’ Higher Secondary School, Jowai ha West Jaiñtia Hills bad 185 ngut na Alpha English Higher Secondary School, Nongpoh ha Ri Bhoi.
U samla Eprin G Marak, Klas 9, Ampati Government Higher Secondary School, u la sam ïa ka jingshem jong u lyngba ka prokram da kaba ong, “Nga la ïoh shibun ki jingmyntoi na ka SPARK khamtam ha ki jinghikai tynrai kiba ïadei bad ka jinglongbriew manbriew (Values) bad kren paidbah (Public Speaking). Ngam junud wat tang ban ïeng ha klas. Bad lada nga kren ruh, ngam nang ban ïeng ha ka rukom kaba dei. Hynrei mynta ka sngi nga ïeng hangne hakhmat jong phi baroh bad nga pyrshang ban kren shai bad da ka jingshlur lyngba ki jinghikai ba nga ïoh na kane ka prokram.”
U samla Lambhameki Marweiñ, Klas 8, Alpha English Higher Secondary School, u la ong, “Nga jupyrkhat ba nga dei u khynnah uba shlur hynrei haba ka SPARK ka la wan sha skul jong ngi, nga shem ba dang bun kiei kiei ba nga dei ban ïoh jinghikai bad pyrshang. Nga ai khublei ïa ki Trainer kiba la ïarap ïanga ba ngan dang long shlur man ka sngi.”
