Ka jingthmu jong ka DLRMP ka long ban ïoh jingithuh ïa ki khyndew ki trai jaka, ong u Bah Teibor
Shillong, Lber 12: Ka KHADC lyngba u EM ba khmih ïa ka Land u Bah Teibor Pathaw u la ong ba ka jingthmu jong ka Digital Land Record Modernization Program (DLRMP), kadei ban shna ïa ki Cadastral Map jong ki bynta ne plot jong ka khyndew na ka bynta kawei pa kawei ka shnong bad ban pyni ruh artad ïa ki pud ki sam.
Ïa kane u la jubab ïa ka jingkylli ba la wanrah da u MDC ka Mawthadraishan u Bah Jambor War uba la pan jingtip halor ka rukom treikam bad jingthmu jong ka DILRMP kiba la ai jingmynjur sha ka KHADC.
U EM u la ong ka jingthmu ka long ruh ban pyni ne identify bad ban pruid dak ïa ki pud ki sam ki shnong, ban ïoh ïa ka dur ne shape, ka jingheh ne area ki jingdon ki jingthung jingtep ka jinglong ka khyndew bad kiwei kiwei.
U Bah Teibor u la ong ban shna ïa ki dulir halor ka nongrim jong ki map. Kane kan pynduna ïa ka jingïakajia ha ka Liang u pud u sam, kane ka skhim ka ïarap ban pynbha ïa ka rukom pynbiang ïa ki dulir jaka puta katkum kane ka juk hynrei kam pynkylla ïa ka rukom bat khyndew ba la ju leh haduh mynta.
“Kane ruh kan ïarap ban pynskhem ban ïada ïa ka jinglong trai bad ïa ka hok nongkynti halor ki khyndew ki shyiap jong ki. Kane ruh kan khanglad ïa ki briew ba khlem jingsngew bad pyndik pynshitom ïa kito ki trai jaka badei hok da kaba ai nishan ha ka aiñ bad kan pynduna ruh ïa ki mukotduma khnang ban ïa imlang sahlang da kaba suk ba saiñ,” ong u EM.
U la ong ba kane ka prokram kan ïarap ban ïoh jingtip kiba biang ïa ka khyndew, nangta kan ïarap ïa ka sorkar ban pyntreikam ïa ki kam ba ïadei ha ka imlang sahlang kum ha ka Koit ka Khiah bad Sanitation. Kan ïarap ïa ka sorkar ban pyntreikam ïa ki kam pynroi, kum ki surok ki lynti syngkien, ka supply umbam umdih bad kiwei kiwei. U la ong ruh ba kane kan ïarap ïa ka jingpyntreikam ïa ka Meghalaya Land Transfer (Regulation) Act, namar kito kiba pynkheiñ ïa kane ka aiñ lah ban lap da kaba suk.
“Lada don ki dulir kiba biang kan ïarap ïa ki trai jaka ban wad ïa ki jingïarap na ki Bank, ne skhim na ka sorkar. Kane ka prokram ka thmu ruh ba kan ym ktah ïa ka rukom bat khyndew ne mushlia ïa ki rukom treikam ki ADC hynrei kan ïarap ban pynkhlaiñ shuh shuh ïa ka rukom bat khyndew da kaba pyndonkam ïa ki kor ki bor jong kane ka juk ba mynta,” ong u EM.