“Ka Clan Bill ka dei ba ki Kur kin hap pynrung kyrteng ban ïoh ki jingïada na ka KHADC.”

Shillong, Lber 12: Na ka bynta ka jingdonkam ban buh ryntih ïa ki Kur ki Jait hapoh ka thup ka KHADC na ka liang u EM Elaka u Bah P N Syiem u la ïathuh ba ka jingwanrah ïa ka Clan Bill ka long ba ki Kur ne seng Kur kidei ban pynrung kyrteng ne Register khnang ban ïoh buh jingthoh bad ba kin ïoh ruh ki lad jingïada da ka aiñ hapoh ka KHADC.
Haba jubab ïa ka jingkylli ba la wanrah da u MDC ka Liang Ïatei u Bah Jambor War uba la kwah tip ïa ka thup ki Kur hapoh ki trai ri trai muluk jong u Khasi kiba la pynrung kyrteng ruh hapoh ka KHADC.
Halor kane na ka liang u MDC ka Nongpoh u Bah Balajied Rani uba la wanrah ïa ka jingkylli kaba bynrap bad uba la kwah tip ïa ka jingïoh jingmynjur ïa ka Clan Bill ne ba ka EC kan pynmih da ka jingpynbna ba shipor khnang ba ka Council kan ïoh jingithuh ïa ki Kur.
Ha kaba ïadei bad kane u EM Elaka u la ong ba ka EC kan sa khmihbniah halor kane la ka donkam ne em ban pynmih ka jingpynbna khnang ba kan ym ïatyngkhuh bad ki kyndon ka Clan Bill.
Halor ka jingai jingmut jong u MDC ka Laban Mawprem u Bah Mitchell Wankhar kaba ïadei bad ka jingpynbeit spel dak ïa ki kyrteng kur bad kumjuh ïa ka jingkylli bynrap u MDC ka Nongpoh u Bah Balajied Rani uba la ong ba ha kano ka rukom ka Council kan pynshong nongrim ban pynshisha ba kidei ki Kur Khasi namar ki don ki briew kiba pynkylla jait tang ban kam trai ïa ki jaka puta khamtam eh lyngba ka tang jait.
U EM Elaka u la ong ba lada shah ki kyndon ynsa lah ban pynbeit ïa ki jingspel dak ïa ki kyrteng ki Kur.
“Ki kur kin hap ban register bad ngin pyrshang ban peit ïa ki kyndon ban ïoh bsuh bad ynda la ïoh ka jingmynjur bad pynlong aiñ ïa ka Khasi Lineage Act lah ban bsuh lang ïa ka Clan Administration bad haba ïadei bad ka tang jait ngin sa shim khia lyngba ka Law Department,” ong u EM Elaka.