Yn pynshitom da kaba tyngeh kat kum ka aiñ ïa kiba donkti pynbthei bom IED; ong u CM

Shillong, Lber 12 : U Myntri Rangbah ka Jylla Conrad K Sangma mynta ka sngi Ba-ar, ula ong ba ka Sorkar kan ai ka jingpynshitom kaba tyngeh kat kum ka aiñ ïa ki briew kiba donkti ha lyndet ka jingpynbthei bomb IED ha Them ïew Mawlong, myn ha ka miet 9 tarik Lber.
“…la bun ngut ki briew kila shah kem mynta bad la ai ka jingpynshitom ba tyngeh ïa ki. Kumba nga ong, ngin pynthikna ba ki briew, kiba donkti kin shah kem lut” ong u Conrad haba ïakren bad ki nongthoh khubor.
Ula ong ba ka Tnad Pulit ka la treikam sted bha halor ka jingïoh lum khubor syntiat bad ka jingpyn donkam ïa ki kor ka juk ba mynta.
“Ki pulit ki dang pynlong ïa ka jingtohkit bad bun ngut ki briew ki la shah kem bad wat hynnin ka miet, la pyntip sha nga ba haduh ka por 12 baje mynmiet, nga ïoh phone call na ki heh Pulit ba pyntip ïa nga halor ki sienjam bapher bapher ba la shim bad kumta, nga la peit pyrman bha ïa ka jinglong jingman” ula bynrap.
Haba kylli la ka Sorkar kan dang bteng ban shong ïakren iasuk lada ka HNLC ka donkti ha kane ka jingpynbthei bom, u Conrad ula ong ba kane ka dang dei tang ka jingantad hynrei ngin sa peit ynda ngi lap mano ba donkti.
“Hadien ba ngi la lah ban pynthikna ryngkat bad ki sakhi satar, ngin sa lah ban ai ka jingkren aiu ba ngi rai” ula ong.
“Hooid, ki don katto katne ki kam ba ngi lah jam shakhmat. Ngi la leh ïa ka jingwad bniah, jingtohkit bad kiwei kiwei bad ki khubor ba ngi ïoh lum ki pyntip ba ki don ki briew bad kynhun hynrei khlem ki jingtip kiba bniah bad ba pura, kam long kaba bha ïa nga ban kren eiei mynta” ula bynrap.
Ha ka miet sngi U Blei, arngut ki briew kynthup u Nongïalam ka HNYF ula shah kem halor ka jingkynnoh donkti ha ka jingpynbthei bomb IED ha Them ïew Mawlong. Kine ki kyrteng u Tarson Lymba uba dei Disciplinary Secretary ka HNYF bad u Ebakordor Nongpluh.
Hynnin ka miet, ki Pulit kila kem sa 4 ngut ki briew na Ri-Bhoi District bad ïoh kurup ruh ïa u bom IED u bym pat pynbthei.