Jowai. Lber, 12: Ka prokram ai jinghikai ba ar sngi ne ka ‘Marketing and Promotional Workshop’ hapoh ka “Scheme on Studies for Promotion & Strengthening of Black Pottery haka shnong Tyrshang bad Larnai, West Jaiñtia Hills District la pynlong da ka Rural Craft and Engineering Division (RC&E) mynta ka sngi ha Tyrchi Inn, Khliehtyrchi, West Jaiñtia Hills.
Ïa kane ka prokarm ai jinghikai ba ar sngi la sdang mynta ka sngi 12 tarik u Lber bad pynkut lashai ka sngi 13 tarik u Lber, 2024. Ha kane ka sngi sdang la wan ban donlang da u Joint Director, Commerce and Industries, Shillong bah M. L Wanshong kum u kongsan, katba u General Manager, DCIC, Jowai bah B. Warjri kum u symbud kongsan.
Kane ka projek “Scheme on Studies for Promotion & Strengthening of Black Pottery ha Tyrshang bad Larnai, West Jaiñtia Hills District, Meghalaya” la ïarap pisa da ka tnad Commerce and Industries (DCI) jong ka sorkar jylla bad kane ka projek la pyntreikam da ka Mahatma Gandhi Institute of Rural Industrialization (MGIRI) Wardha, Maharashtra, kaba dei ka R&D Institute hapoh ka Ministry of MSME, jong ka sorkar kmie.
Ka jingthmu ba kongsan jong kane ka project ka long ban pynkiew shuh shuh ïa ki karkhana tynrai kiba ïadei bad ka rukom thaw khiew khyndew, kumjuh ruh ban pynïaid ïew ïa ki mar ki mata bad ban pynmih khambuh ïa ki bad ha ka juh ka por kin ïoh jinghikai katkum ka juk ba mynta.
Na ka liang u Joint Director Commerce & Industries bah M.L. Wanshong ha ka jingkren ula ai khublei ïa ki nongpynlong ïa kane ka prokram kaba long ruh ka lad jingïarap ba kyrpang ïa ki nongthawkhiew jong kitei ki ar shnong Larnai and Tyrshang. Ula ong ha manla ki ïew pyni nam ki nongthaw khiew jong kitei ki ar shnong kila wan rah ïa ki mar jong ki ha ki jingshna kibapher bapher. Ula kyntiu ba kin sam leh ïa kane ka jingtip jong ki sha kiwei de kiba long ki lawei.
U Dr. K. Venkata Rao, Deputy Director Rural Craft and Engineering ula pyntip ba kane ka prokram ba ar sngi ka long kum ka lad ban ai jinghikai ba bniah ïa ki nongthaw khiew, naduh ka rukom pynïaid ïew, ka ki rukom shna ba bun jait bad ban pynpaw pyrthei ïa ki.
Ula ong hapoh kane ka project ka jingtreikam jong ka hapoh shisnem bad ka MGIRI la pynkhreh ha ki ar bynta kata ka Phase-I ban pule bniah ïa ki khiew khyndew (black pottery artisans) bad ban pule halor ka rukom pynwan dur ïa ki. Katba ka Phase-II kaba ïadei bad ka rukom ai jinghikai ba bniah halor ki sap pynwan dur bapher bapher bad ka jingpynneh pynsah ïa ki.
Ula pyntip ïa kane ka bynta jong ka phase-I la dep ban leh ïa ka, katkum ka survey ki don 127 ngut ki nongthaw khiew kiba don sap, 104 ngut na Larnai bad 23 ngut na ka shnong Tyrshang bad la ai jingtip babniah ïa kitei ki nongsthaw khiew bad ka ïing ka sem jong ki ba kin im ryngkat ka imlang ka sahlang, ka synshar ka khaddar bad ka ïoh ka kot.
Katba haka Phase II ïa ki bynta ba donkam jong ka project hapoh ka ‘capacity Building program’, ki nongshah hikai ban thaw khiew khyndew (Black Pottery) la pynlong da ka RC&E division ha MGIRI, Wardha naduh ka 6th October haduh 4th November, 2023 na ka bynta ki 16 nongthaw khiew na Larnai bad Tyrshang.
Ïa ka Skill Development Training hapoh ka Project “Scheme on Studies for Promotion & Strengthening of Black Pottery ha Tyrshang bad Larnai village, West Jaiñtia Hills District, la pynlong naduh ka 15th January haduh 29th January, 2024 na ka bynta ki 76 ngut na ki ar shnong.
Shuh shuh ula pyntip hapoh kane ka prokram ai jinghikai ïa ki nongthaw khiew kin sa ïoh lad ban leit mih sha Siliguri, West Bengal bad sha Varanasi, Uttar Pradesh naduh ka 11th February haduh 20th February, 2024 ïa ki 8 ngut yn jied na kitei ki ar shnong jong ka Larnai bad Tyrshang.
Kiwei de kiba ai jingkren bad ki jingbatai bniah ki kynthup ïa Dr. Annaji Sharma, Professor & Management NIFT, Hyderabad, u Siewspah D. Buhroy, Assistant Professor Fashion & Management studies, NIFT, Shillong, u Viswanath B Kasi, Founder & Director Inkwisitive Global Advisory Singapore, Hyderabad, u Shri. R S Nongbri, Assistant Director, Branch MSME, DFO, Shillong bad u Mondon Lyngdoh. Jr. Executive KVIC, Shillong ‘Different Schemes of KVIC’ Kiwei de kiba la wan ban ïa donlang ki long u H.D Sinnur, ka kong S. Kharpran, Functional Manager, DCIC, Jowai bad ki nongtrei na ka Commerce and Industries Shillong bad Jowai.
