Nongpoh, Lber 12: Tang hadien ba ki jait bynriew Garo hapoh ka kynhun All Ri-Bhoi Garo Headmen Association kila leit ban ai jingthoh syndon sha u Myntri Rangbah ban ithuh ïaka jinglong Rangbah Shnong jong ki hapoh u pud u sam ka Hima Mylliem jong ka Raid Marwet, u bah Pynïaid Sing Syiem CEM ka KHADC haba kren haka jingïalang bad ki Rangbah Shnong mynta ka sngi ha Nongpoh u la kren shai ba ka aiñ kam ithuh ban long Rangbah Shnong da ki jaitbynriew Garo haki shnong Khasi namar katkum ka Appointment and Succession of Syiem, Deputy Syiem, Electors and Rangbah Shnong of Mylliem Syiemship Act 2007 kala kren shai ba tang ki jaitbynriew khasi kiba lah ban long Rangbah Shnong.
U la ong ruh ba ki don ki jaitbynriew Garo haka Raid Marwet kiba kam kum ki Rangbah Shnong bad naka liang ka District Council kan sa khot hajir ïaki namar ka jingpyndonkam bakla ïaka bor bad ka muhor Rangbah Shnong bad kum ka Council hi kam ailad da lei lei ruh ba ki jaitbynriew Garo kin long Rangbah Shnong hapoh ki shnong Khasi.
Ha kawei pat ka bynta naka liang u Bah Pynïaid Sing Syiem u la pynpaw ka jingsngewsih bad pangnud ba bun naki shnong khasi kiba don ha khappud ka jylla la buhai shnong da kiwei ki jaitbynriew bad niar eh ban shem ïa u khasi bad kane ka wanrah ka jingeh kaba khraw ha kaba u la pynshlur ïaki samla khasi ba kin pyniar ka kamai ka kajih wat sha ki thaiñ khappud ban pynneh ïaki jaka bad u pud u sam.
