Shillong, Lber 12: U EM ka tnat Elaka uba dei ruh u CEM ka KHADC u Bah P N Syiem u la ong ba ïa ka ilekshon ba pura ïa u Wahadadar hapoh ka Shella Confederacy yn pynlong noh hapoh ka shibnai shiteng.
Ïa kane u la jubab ïa ka jingkylli ba la wanrah da u Nongïalam ka Liang Ïatei u Bah T W Chyne bad u MDC ka thaiñ u Bah Teiñwell Dkhar hapoh Dorbar Mang tyngka ka KHADC.
Na ka liang u Bah Chyne u la ïathuh hapoh ka Ïing ba ka la don kumba palat 15 snem ba khlem da ïoh shuh ban pynlong ïa ka ilekshon hapoh ka Shella Confederacy bad ba khlem ïoh ïa u Wahadadar ba pura bad la shu thung da u Adminstrator bad u Acting bad bun na ki shnong ki la klet ruh ïa kane ka kam khamtam ba ka rukom synshar khaddar ka paw bha kumta u la kyntu ïa u EM Elaka ban pynkloi noh ïa kane ka kam.
Katba u MDC ka thaiñ u la ïathuh ba katkum ka jingtip ba la ïoh la ong ba baroh ki shnong ki la dep phah lut ïa ka kyrteng ki nongthep vote ne voter’s list.
Haba jubab ïa kane, u EM Elaka u la kubur ba ka long kaba shisha ba khlem la lah ban pynlong ïa ka ilekshon hynrei u la kular hapoh ka ïing ba hapoh shisnem shiteng yn pyndep noh ïa kane ka kam.
