Shillong, Lber 12: U Myntri Rangbah ka jylla, u Conrad K Sangma, ha ka sngi baar, u la ïashim bynta ha ka CM Elevate Conclave, 2024 kaba la long ha U Soso Tham Auditorium, Shillong. Ha kane ka sngi la donlang ka myntri jong ka tnat ki kam rep ka M Ampareen Lyngdoh bad ka MLA, ka Saipung-Sutunga, ka kong Santa Mary Shylla.
Haba kren shaphang ka jingsdang jong ka CM Elevate program u Myntri Rangbah u Conrad K Sangma, u la ong ba ka sorkar jylla ka la trei halor ka kam ka Meghalaya ba kan poi ha ka kyrdan kaba 10 na kiwei ki jylla ha ka ri.
“Ngi la sdang ïa kane ka kam ban pynlong ïa ka jylla kaba poi ha ka kyrdan kaba 10 napdeng kiwei ki jylla bad ngi la ïaid shakhmat da ka jingthmu ban kynjoh sha ka thong jong ka 10 billion economy bad ban bynrap sa 10 tylli ki lad bad ban ithuh ïa ki 10 tylli ki jaka ki ban long ki nongïalam jong ka jingkiew bad ka ïohkam ïohjam,” u la ong.
U la bynrap ruh ba ki briew ki la sdang ban seng ïa la ki jong ki kam, ki leh ïa ki kam bad na ka liang ka CM Elevate ka la thmu ban thaw ïa ki sawdong sawkun na ka bynta ka jingkiew ki lad plie kam plie jam bad ban ïarap pisa na ka bynta ban thaw ïa ki kam.
“Ka CM Elevate kadei ka nuksa ba la shimkhia da ka sorkar ban pynïaid shakhmat ïa ki jingangnud jong ki samla bad kiba sengkam lajong da kaba pynïoh ki tyllong ban pynkylla ïa ki jingmut sha ki jingjop,” u la ong.
U la ïathuh ruh ba kumba 1254 ngut kiba ïoh myntoi kaba la kot sha ka jingïoh kaba la kot kumba T. 56 klur kiban ïoh myntoi lyngba ki skhim kiba bun jait lyngba ka CM Elevate program ka ban pynmih ki kam kumba 50,000 tylli.
Haba plie ïa ka Meghalaya State Floriculture Mission ha kane ka prokram, u Myntri Rangbah u la ong ba ka long kaba kongsan bad ka sienjam kaba heh halor ki kam rep bad ka roi ka san ha ki thaiñ nongkyndong. U la ong ba ka kyrdan ka jingsdang kumba 3,100 ngut kiba ïoh jingmyntoi bad ha ka jingmang tyngka kaba long T. 240 klur ha kine ki 3 snem kiba la thmu ban thaw ïa ka Meghalaya kum ka pdeng ki kam rep syntiew.
Katba ka Myntri ki kam Rep ka kong Ampareen Lyngdoh ka la ong ba ka sorkar ka la buh ïa ka thong ban thaw bun ki kam bad ki prokram kum ka CM Elevate bad ka Floriculture Mission ka dei ka sienjam halor kane ka bynta. Ka la banjur halor ka jingdonkam ban ithuh ïa ki kam ki samla ban pynkynthup ïa ki ha ki kam ka ïoh ka kot.
Na ka liang u Myntri Rangbah u la ruh sam ïa ki cheque bad ki shithi ba la mang sha ki nongïoh myntoi na ka Prime Agriculture Response Vehicles, Piggery Development, Poultry Farming, Goat Farming, Common Facility Centre, Agriculture Warehouse scheme kiba hab hapoh ka CM Elevate program. La sam ruh ïa ki shithi mang tyngka hapoh ka Meghalaya Floriculture Mission.
La pyllait ruh ïa ka Mission Document ka Meghalaya State Floriculture Mission bad ka Meghalaya GDP Vision 2028.
