Ka jingshah thombor ki Khristan ha Chhattisgarh ka pyni markhongpong ïa kaei kaba ka BJP ka kular: KJCLF
Shillong, K’lyngkot 03: Hadien ba ka don ka jingshah thombor ki Khristan bad ka jingshah pynjulor ka iingmane ha ka jylla Chhattisgarh ha ka Lah Sngi u Blei ka Khasi Jaintia Christian Leaders Forum (KJCLF) ha ka sngi Ba-ar ka la ong ba kane ka jingjia ka pynkyndit shibun eh ïa ka forum namar kaei kaba U Myntri Khynnah ka Sorkar Pdeng ba peit ïa ka tnat kaba dei ïa ki Rit-Paid, dang shen u la wan ha ki thaiñ jong ngi ban ïakynduh bad ki nongïalam jong ki kynhun bad Balang Khristan bad kiwei de ki Rit Paid ha kiba u la pynpaw ba ka Seng BJP kaba synshar ha Sorkar Pdeng ka kwah ban weng noh ïa ka jingsngewthuh jong ka ‘jingsheptieng’ na ki jingmut jingpyrkhat jong ki kynhun Rit Paid – ha kaba ki Khristan ki long kawei kaba kum kata. Pynban, ki jingjia kiba la jia ki pyni da kumwei pat.
U Rev Dr Edwin H Kharkongor u la ong ba kane ka jingjia kaba la jia ka pynkthang ha ki riewngeit Khristan namar ha kane ka jimngthombor ïa ki bad ka jingpynjulor ïa ki tiar ki tar bakhuid bad bakyntang wat haba ka snem thymmai 2023 ka dang sdang.
“Ngi don ka jingkyrmen ba kito kiba shong ha ki shuki jong ka kyrdan bad ka bor kin jin da la kren pyrshah ïa kito ki briew bad ki kynhun kiba lehbeiñ lehkhoh pyrshah ïa ki Khristan bad ki briew kiba pyndonkam ïa la ka hok shimet ban jied hi ïa la ka jingngeit bad ka niam,” ong u Rev Dr Edwin H Kharkongor
Shuh shuh u la bynrap, “ Ka jingsngap jar kaba sawa jam jong u Myntri Rangbah Duh ka Ri pyrshah ïa kito kiba lehbeiñ ïa ki Khristan bad kiwei de ki Rit Paid ka long kaba pynlyngngoh shibun. Lane, hato ka dei pynban ka jingai jingbit kaba pynshlur ïa kine ki kynhun ban leh bad ïai leh ïa kiba kum kine ki kam ba pyrshah ïa kiwei pat ki nongshnong shnong tang namar ba ki dei ki Khristan ne ki dkhot jong kiwei pat ki khynhun Rit Paid?”
U la ong ruh ba na ka liang ka forum ka ïeng bad don lang ryngkat bad ki riewngeit Khristan bad kiwei ha ka Ri kiba ïakynduh bad mad ïa kine ki jingshahleh jubor, bad ka Forum ka duwai na ka bynta ba ka jingsuk bad jingïalong shipara kan neh.
“Ka KJCLF ka kyntu ïa ki bor ha ki Jylla bad ka ka Sorkar Pdeng ba kin ai jingïada na ka bynta ki jingim briew bad ki jingdon jingem jong ki Rit Paid ha kylleng ka Ri. Ha kajuh ka por ruh da ka kti kaba khlaiñ bad ba hok dei ban teh lakam ïa kine kiba pynjia ïa ki kam jingshun bad kam thombor,” bynrap ka kyrwoh.