Pynjulor ki shit niam ïa ka ïingmane Katholik ha jylla Chhattisgarh

0

Shillong, K’lyngkot 03: Ki shit niam ha ka jylla Chhattisgarh ha ka Lah Sngi U Blei mynta ka taiew ki la hiar thma bad pynjulor ïa ka Ïingmane Katholik ha ka shnong Edka jong ka District Narayanpur, Chattisgarh bad ha ka jinghiar thma ïa kane ka ïingmane ki shit niam ki la pynjulor ïa ki stashu jong ka Maria, ka stashu jong u Jisu, ïa ka Groto jong ka ïingmane bad kumjuh ïa ka jaka sah jong ki Phadar.
Kane ka Ïingmane ba la ainam ha ka Dohnud Bakhuidtam u Jisu kaba la shah pynjulor ka dei kaba hap hapoh ka jyllaniambah Raipur.
Katkum ki tyllong khubor kiba la ïohlum, la ong ba kane ka jinghiar thma ka dei namar ka jingkynnoh ba ka don ka jingpynkylla niam jubor ïa ki riewlum Adivasi bad ka jingtei be-aiñ ïa ki Ïingmane ha kane ka Parish.
“Kine ki shit niam ki la pynpait ïa ka ïit jong ka Ïingmane, ki la pynpra ïa ka duwan, ïa u stashu jong u Jisu ba la shah sah narphna, ïa ki jingbuh jingsat jong kane ka ïingmane,” ong u Parish Priest jong ka Sacred Heart Parish u Fr Jomon Devasia.
U la ong ruh ba kine ki shit niam ki la pynjulor ruh ïa ka Groto jong kane ka ïingmane.
“Ka Ïingmane ka dei kaba la tei kumba 50 snem mynshuwa bad ïa kaba la pynbha bad pynwandur biang dang tang kumba san snem mynshuwa hynrei ha kane ka jingshah hiar thma baroh ki jingdon jingem bad ki jingpynbha ki la julor lut,” u la kren bynñiaw.
Katkum ka tyllong khubor na ka Balang, la ong ba ka don ruh ka jingpynbor ïa ki Khristan kiba la bud ïa ka niam Khristan ba kin iehnoh ïa ka jingngeit Khristan bad ban bud biang noh ïa ka niam tynrai. “Dei hadien ba kim treh ban iehnoh ïa la ka jingngeit ba kine ki shit niam ki la hiar thma,” ong shuh shuh ka tyllong khubor.
La ong ruh ba ym tang ba ka don ka jingpynjulor ïa ka ïingmane hynrei wat ïa ka ïing ka sem jong ki riewngeit ruh bad kumjuh ka jingpynïap dusmon ïa ki jynri jyndup jong ki.
“Kane ka jingshah hiar thma kam dei ba ki Hindu ki pyrshah ïa ki riewlum bad bud noh ïa ki jinghikai ka niam Khristan,” ong u Archbishop Victor Henry Thakur.
“Kane ka jingjia kam don jingïadei eiei ruh kumba mih ka jingkynnoh ba ka don ka jingpynkylla niam jubor hynrei ka dei beit ba ka don ka jingdkhoh ha ka shongsuk shongsaiñ,” u la bynrap.
Shuh shuh u la ong ruh ba ka don ka jingjia kaba kum kane ha kine ki khyndiat bnai ba la leit hynrei na ka liang ki pulit kim shym la shim kino kino ki lynti ban pynshitom “Lehse dei ba kam don ka jingpynshitom ba ki sa shlur ban shim haduh kat kane ka sienjam,” u la ong.
Kane ka jinghiar thma ka dei hadien ba ka Sarva Adivasi Samaj (SAS) ka la pynlong ïa ka jingïakhih ban pynrem halor kane ka jingkynnoh ba ka don ka jingkynnoh pynkylla niam jubor ïa ki riewlum adivasi kiba ngeit ïa ka niam tynrai jong ki.
La ong ruh ba ki Pulit ki la shong jingïalang ha ka ophis jong u District Collector (DC) ka Narayanpur bad ki nongïalam ka Sarva Adivasi Samaj ha shuwa ban sdang kane ka jingïakhih bad na ka liang kine ki nongïalam ka SAS ki la aiti ruh ïa ka dorkhas halor ka jingkynnoh jong ki ba ka don ka jingpyrshang ban pynkylla niam jubor.
La ong ruh ba kane ka la jia hapdeng ka por 1:00 baje noh sngi hadien ba ki paidbhur ki la ïalumlang ban pynlong ïa ka jingïakhih hajan ka skul Viswadeepti.
Na ka liang jong ki Pulit tang shu ïoh jingtip ki la hiar marmar sha kane ka jaka ban tem ïa kane ka jingshah hiar thma jong ka Ïingmane bad ha kane ka jingjia u Superintendent of Police (SP) ka Narayanpur u Sadanand Kumar u la mynsaw ruh ha ki bynta jong ka khlieh na ka jingshah ktah kti ha ki paidbhur bad nalor jong u ki don kiwei pat ruh ki Pulit kiba la shah pynmynsaw hynrei kiba la shu mynsaw malu mala, ong ka tyllong khubor na ka PTI.
Ki Pulit ki la ong ruh ba kane ka jingjia ka dei kaba la kynshoit da ka Adivasi Samaj bad ïathuh ruh ba na ka liang jong ki Pulit kin sa rejistar ïa ka ejahar halor kane ka jingjia baroh. Kat haduh mynta, ki Pulit kim pat shym la kem satia ïano ïano ruh halor kane ka jingjia.
U District Collector u Ajeet Vasant u la ong ba ha kine ki khyndiat bnai ki don ki jingjia kiba kum kine hynrei kiba shu don malu mala ka jingshah pynjulor.
Ha ka 27 tarik, Nohprah, 2022 ka la don kaba kum kane ka jingjia ha ka jylla Karnataka jong ka District Mysuru ha kaba ki shit niam ki la hiar thma bad pynjulor ïa ka stashu jong u Khunlung Jisu ha ka Ïingmane ka St. Mary’s kaba kine ki shit niam ki la rong tuh ruh ïa ka synduk jingainguh kaba don ha kane ka ïingmane.
Ka tyllong khubor ki la ïathuh ruh ba palat 1,000 ki trai shnong Adivasi kiba bud ïa ka niam Khristan ki la shah beh na ki ïing ki sem jong ki ha kine ki arbnai ba ladep.

Leave A Reply

Your email address will not be published.