Ka jingïakren bad jingïamir jingmut halor ka phang jongka jingseng ne jingsaindur ïa ki longiing long sem ne family planning ka long shisha kawei na ki phang kaba donkam eh ha ka imlang sahlang bad ka jingdawa ba hakhmat eh jong kane ka juk mynta khamtam ha ki thain nongkyndong ba ki briew ki dang duna ka bor pyrkhat. Ka jingshim khïa jong ki nongïalam nïam, doktor, nonghikai bad kiwei pat ki riew trei mon sngewbha halor kane ka phang ka long kaba dei hok ban ïaroh bad ïoh ïa ka jingkyrshan. Haba kren halor kane ka phang bun sien ki paidbah ha ki thain nongkyndong ki shem jingeh ban shemphang bad kawei na ki jingeh kaba nyngkong ka long ba kim long la kloi ban shah shkor ne pynleit jingmut ha ki jingbatai kiba don jingmut. kawei kaba don ha khmut eh ka jingim jong ki ka long beit tang ba im ka la bïang kam pher la ki long kumno kumno ruh wat la ha ka jingshisha tang ban im te wat ki mrad ruh ki im hi. Hynrei ki bapli kim kot ka bor pyrkhat ban pynïapher ïalade na ki mrad. Kumta kane ka phang ka long kaba donkam haduh katta kata ban ïaid shaphrang bad bteng ïa ka jingïamir jingmut bad ïalap ïa ka sha baroh ki thain nongkyndong.
Nalor jong ka tnad sorkar bad ki seng trei mon sngewbha, ki seng niam bapher bapher ruh ki don ka bynta ban synniang ha kaba ïadei bad katei ka phang na ka bynta ka jingmyntoi jong ki paidbah. Katei ka jingïatreilang kan ïarap shibun ïa ki nong shnong shnong jong ka jylla. Kane hi ka long ka khubor kaba khlaiñ khamtam naka bynta kiba bun ki thaiñ kiba dang sahdien bad nongkyndong. Ka por ka la dawa ba donkam ban pynkylla noh ïa ka rukom pyrkhat namar wat ki mrad ruh ki shem jingeh ban im ha kine ki sngi kiba mynta katno tam ki briew. Ka jingbym don ka plan lypa ïa ka longïing ka wanrah jingeh shibun namar ha ka jingbun khun than ka wanrah ïa ka jingbymlah ban pynbïang ïa ki jingdonkam jong ki wat ki longïing ruh ki hap ban ïakynduh mawsiang bad mad ïa ki jingeh kiba bun jait bad ka pynlong mraw wat ïa ka jingim hi.
Ka jingnoh synniang jong ki seng niam khamtam eh ha kaba ïadei bad kane ka phang ka long kaba donkam palat, namar ba bun ki longkmie longkpa ki shim beit ba ki khun ki dei kiba la ai da U Blei, kumta kim dei satia ban kiar na kaba kha khun wat la ki la bun katno katno ruh. Bun ruh ki sngewthuh ba lada ki kiar na kaba kha khun ka long ka pop bah pop san. Ka jingkren bad jingpynshai na ki nongïalam niam naduh ki niam tynrai haduh ki niam kristan halor ka phang ba dei ban don ïa ka longïing kaba la saiñdur paka ban lait na ki jingeh kiba bun jait ka dei ka phang kaba donkam ban bud shisha. Ki lad bad ki lynti ki don ban kyrshan ïa ki paidbah ban peitngor bad phikir ha kaba ïadei bad kane ka phang, ka sorkar ka la pynbiang ïa ki jingdonkam kyrpang ha kaba ïadei bad ka jingai jingïarap ïa ki longkmie longkpa lyngba ki hospital bad ki health centre ha kaba ïadei bad kane ka phang bad kaba sah ka long sa ha ki ban shu pdiang beit ïa kitei ki lad jingïarap hadien ba ki la sngewthuh ïa ki jingmyntoi bad ki jingïada ba ki lah ban ïoh na ki.
Lada ki longïing ki don ïa ka longïing kaba ki la saiñdur kin lah ban ai ïa ka jingieit bad ruh pynbïang khambha ïa la ki jong ki khun ki kti, hynrei ka longïing kaba heh palat, ka lute noh wat ïa ka jingsuk bad ka jingbit jingbiang jong ka longïing hi ruh. Ka jingseng lypa ban don katno ngut ki khun ka dei ban long kat kum ka jinglah ban pyndap bynbiang ïa ki jingdonkam jong ki naduh ha kaba ïadei bad ka jingleit skul, ka bam, ka kup ka sem bad ruh ka jingpynheh pyn rangbah ïa ki ha ka jingsneng jingkraw ba kin long ka lawei ba phyrnai na ka bynta la ka ïing bad ruh ka ri bad ka jaidbynriew.
Ka jinglah ban ïoh pat ïa ka longïing kaba khlaiñ bad kaba bit ba bïang kan ïarap shibun ban kyntiew ïa ka ri bad ka jaidbynriew. Kum ka jaidbynriew rit paid lada ngi long ki briew kiba don ka bor shemphang bad kiba nang ba stad kiwei pat ki jaidbynriew kin ym lah satia da lei lei ruh ban wan tyllep ïa ngi. Hynrei ha kine ki snem baroh namar jong ka jingduk, jingkyrduh ki long ïing longsem kiwei pat ki jaidbynriew heh paid ki shim kabu ban ïapoi kha poi man ym satia naka bynta ka jingieit ba shisha hynrei na ka bynta ban shim kabu ïa ka kamai kajih bad hadien kane pat la nang plie jingkhang ïa kiwei pat ki para kur parajait jong ki. Kumta ka long kaba donkam ban don ïa ka longïing kaba khlaiñ naduh kaba sdang bad ka lawei kan long kaba shngaiñ bad kaba phyrnai.
