Shillong, Jylliew 22: Ka jingïakop mareh thong kaba ju pynlong man la u snem jong ka Meghalaya State Olympic Association, kaba la tip da ka Shillong 10K Run na ka bynta ki shynrang bad kynthei kan sa long ha kane ka sngi Saitjaiñ, 27 tarik Jylliew, ha kaba baroh kiba ladep ban pynrung kyrteng (register) kin hap ban wanpoi ha madan Polo naduh ka por 5 baje mynstep.
Ha ka kyrwoh ba la pyllait hynne ka sngi ka MSOA ka la pyntip ba ïa kane ka jingïakop mareh yn kaweh lama da arngut ki nongïalehkai ba pawkhmat jong ka jylla, kata u nongïalehkai Karate u Damang Syngkon bad u nongïakopmareh ba la pawnam u Benningstar Lyngkhoi.
Yn sdang ïa ka jingmareh ha ka por 6 baje mynstep na Shillong Sports Association Stadium. Ki nongïashim bynta kin ïoh ïa ki t-shirts bad ki bib number ha katei ka sngi shuwa ban sdang ïa ka Shillong 10K Run.
Ka MSOA ka ju pynlong ïa kane ka jingïakop mareh man la u snem kum shi bynta ban rakhe ïa ka Olympic Day. Ka lynti mareh kan long kumjuh kumba long ha u snem ba ladep.
