Mawkyrwat, Jylliew 22: Ka jingïalehkai kynjatbol kaba la tip kum ka South West Khasi Hills District Level Subroto Cup Football Tournament 2026 ka la jam sha ka jingïalehkai ba khadduh ne ka Final ha kaba ka ophis jong ka District Sports Officer, South West Khasi Hills District kan sa pynïalehkai ha ka 2 tarik u ‘Naitung, 2026.
Ha kane ka lympung phainal kan sdang da ka Under-17 jong ki khynnah kynthei ha ka por 9:30 mynstep hapdeng ka Rangthong Christian Higher Secondary School pyrshah ïa ka Little Star Higher Secondary School, Mawkyrwat.
Ka jingïalehkai kaba bud ka dei jong ki khynnah shynrang Under-15 ha ka por11 baje mynstep hapdeng ka Maharam Government Higher Secondary School, Mawkyrwat pyrshah ïa ka Little Star Higher Secondary School, Mawkyrwat.
Nangta, ka jingïalehkai kaba khadduh kan dei jong ki khynnah shynrang Under-17 ha ka por 2 baje nohphai sngi kata ka Rangthong Christian Higher Secondary School, Mawkyrwat kan ïakhun pyrshah ïa ka Balang Mawlangwir Higher Secondary School.
Haba phai ha ka jingïalehkai semi final, Under-17 jong ki shynrang ka Rangthong Christian Higher Secondary School ka la jop da 3 – 1 kol pyrshah ïa ka Little Star Higher Secondary School, Mawkyrwat. Nangta, ka Balang Mawlangwir Higher Secondary School pyrshah ïa ka Jingaiti Higher Secondary School, Nonghyllam da 4 – 0 kol.
Ha ka jingïalehkai jong ki khynnah kynthei Under-17, ka Rangthong Christian Higher Secondary School ka la jop da 3 – 0 ïa ka Modern Academy Higher Secondary School, Rangmaw, katba ka Little Star Higher Secondary School, Mawkyrwat ka la pynliem noh ïa ka Maharam Government Higher Secondary School, Mawkyrwat da 1 – 0 kol.
