Ka jingpynrung ïa ka Ktien Khasi bad Garo ha ka Khyrnit ba Phra dei ka jingjop ki paidbah ym jong kano kano ka party : CM

Shillong, Nailur 23 : U Myntri Rangbah ka jylla u Conrad K Sangma ha ka sngi Balang ula ong ba un dei u briew uba kmen eh lada ïa ka ktien Khasi bad Garo la pynrung ha ka Khyrnit ba Phra ka Riti Synshar jongka Ri, kam pher mano ba ïakren bad ka Sorkar Pdeng, namar kan dei ka jingjop jong u paidbah jong ka Jylla.
Haba kynthoh ïa ki jingai jingmut ba ki 8 ngut ki MLA ka UDP kiba ïasoh sha ka BJP ki pyrshang ban kam burom u la ong ka jingdawa ban pynrung ïa ka Ktien Khasi bad Garo bad pynbeit ïa ki jingeh ha ka kam tih dewiong ka dei ka kam kaba la shim khia da ka sorkar bad ka dei ruh kaba la wanrah da ka Resolution halor ka ktien Khasi bad Garo hynrei u la ong kam pher namar kaba kongsan ka dei ban poi sha ka thong.
“Ka long kaba bakla ban pyrkhat ïa ka kum ka jingai burom. Kaei kaba kongsan ka long ban kynjoh sha ka thong. Baroh baroh ki don la ka jong ka bynta. ïa mynta, ngim tip kaei ka nongrim jong ka Sorkar India, la kan pynrung ne em ïa kine ki ktien tynrai jongngi. Lada ka urlong, kan ym dei ka BJP lane NPP, hynrei ka dei ka jingjop jong u paidbah ka Meghalaya” ula ong.
U Conrad ula ong ba um kwah satia ïa ka jingpaw nam hynrei kaba kongsan ka long ban shem ïa ka lynti ban pynurlong. “Lada lah ban shem ïa ka lynti ban pynbeit ïa ki jingeh, kane kan kham pynkmen bad pynhun ïa nga ban ïa ka jingkwah ban pawnam”.
Halor ka kam tih dewiong, u Myntri Rangbah ula ong ba ka Jylla kala jam shakhmat hadien ka hukum jong ka Supreme Court u snem 2019, hynrei ki jingtynjuh ki dang ïai don haduh mynta.
“Ngi la ïakhun ïa ka mukotduma ha u 2019 bad ka Supreme Court ka la ai ïa ka hukum ban weng noh ïa ka jingkhang tih dewiong,hynrei ha ryngkat ka kyndon ba kiei kiei baroh ki dei ban ïaid ha ka rukom kat kum ka jingstad saian haba bud ryntih ruh ïa ka MMDR Act. Ban jam shakhmat kat kum ka MMDR Act, ngi hap ban bud ïa katto katne ki kyndon- ka jaka ba 100 hectare, jingtih par da ka jingstad saian, jingtih open cast bad kiwei kiwei” ula ong.
“Namar ka rukom shong jong u dewiong hangne, kam long kaba suk ïa kiba bun ki nongtih par ban jam shakhmat. Ngi la don saw tylli ki par kiba treikam ïa mynta kane hi ka pynpaw ba ngi la jam shakhmat” ula ong.
“ Tangba na ka liang ka sorkar ka la ïai ïakren bad ka sorkar pdeng ban pynkylla ïa kine ki kyndon khnang ban ïoh tih da ki par ba rit ba ki nongkhaïi ba kham rit ruh kin lah kot bor bad kane ruh kan long hi kat kum ka jingstad saian hi. Halor kane ka sorkar pdeng ruh ka dang shong bishar ïa ka kam” pynkut u Myntri Rangbah.