Ka jingim jong ki nonghikai ka dei kaba biang tam ba ki khynnah skul kin ioh pyrthuh bud: Dr. A.J.Syngkon

Shillong, ïaiong 1: Ha ba kren kum kum u kongsan ha ka Annual School Sports Meet, 2025 jong ka Langstiehrim Presbyterian Secondary School, Mairang, kaba la long ha ka 29 tarik mynta u bnai, u Dr. A J Syngkon, MP ula ong ba ka jingim babha jong ki nonghikai ka dei ka nuksa kaba biang tam ba ki khynnah skul kin ïoh ban pyrthuh bud. U la ong ba ha kane ka juk ïabeh kaba mynta lei bun ki kmie ki kpa kim lah ban ailut ïa ka por baroh sha la ki jong ki khun, hynrei ki nonghikai kiba lah ban pyndap ïa kata ka bynta kaba donkam eh sha ki khynnah skul ha kaba sneng ba kraw ba saindur ïa la lawei jong ki.
U Dr A J Syngkong, u la ong ruh ba ka jinghikai kaba donkam eh kam dei lehse tang da ka ktien hynrei ka nuksa jong ka jingim babha kum ki nonghikai bad ki khynnah kin thrang ne angnud ban long kum kita ki nonghikai bad ki don shibun ki jinghikai kiba ki lah ban hikai tang da ka jinglong jingim jong ki hi. U la pynpaw ruh ïa ka jingsngewkmen ba wat la ka jingïoh jingsiew jong ki nonghikai kam da long eh kaba biang ha kane ka skul hynrei ki don pat ka mynsiem ban ai ïa ka jingshakri kum ki nonghikai.
U la ai mynsiem bad kyntu ruh ïa ki nonghikai bad kumba ki khynnah skul kin don bad ki kumba shiphew snem tam, kane ka dei ka por kaba biang tam ban saindur na ka bynta ka lawei ka jong ki, khnang ba ki khynnah ki ban mih nangne kin lah ban ai pateng pat ïa ka jingshakri kaba bha naduh ïa la ka ïing ka sem, ka shnong ka thaw bad ka ri bad ka jaitbynriew. U la pynpaw ruh ïa ka jingsngewkhia kaba jur khamtam lei halor ka jinglong jingman jong ka jylla ha kine ki sngi ha kaba haduh 41% ki longiing ki dei kiba pait ba pra ha kaba ki kynthei ki hap ban kit hi ïa la ka jong ka ïing ka sem.
Ha kane ka sngi la ïoh ruh ïa ka jingkren ka u Dr. R.J.Cunville, uba la long kum u symbud kongsan ha kaba u la pynkynmaw ïa ka dkhot na ka ktien U Blei kaba ong, “To hikai ïa u khynnah“ha ka lynti ba u dei ban leit, te un ym kynriah na ka wat haba u la tymmen.”. U la pynkynmaw ruh ïa ka jingong jong uwei Socrates uwei na ki khraw pyrkhat ka mynnor uba la ong ba ka jingbieit jingthem ka dei ka kam bymman (crime). Kumta ula ïaroh ïa ki jingshakri ba kane ka skul ka la ai sha ki khynnah hangne da kaba ong ruh ba ka jingstad ka long ka jingshai kaba beh noh ïa ka jingdum, kaba beh noh ïa ka jingbieit bad kaba ai ïa ka jingkyrmen na ka bynta ka ri bad ka jaidbynriew. U la ai mynsiem ruh ïa ki nongpyniaid jong kane ka skul ba kin nanglah ban tei ïa ka lawei jong ki khynnah bad kyrmen ba ha kawei ka sngi kane ka skul ka nangïai pyrnai kum ki khlur ha sahit bneng.
Ha kane ka sngi la pyniaid ïa ka jingïalang da u Bah Batskhemlang Marbaniang bad la ïoh ïa ka jingkren pdiang sngewbha na I Tbn. A Marbaniang badei u Chairman ka M.C. La ai ruh ïa ka memorandum sha u Kongsan da i Headmistress, Kong C. Kharkongor bad la ïoh ïa ka jingkren pdiang sngewbha na I Kong C Ryntathiang.
Ha kane ka sngi la ïoh ruh ïa ka jingkren lyngkot na u Bah B Syiemiong, Sordar jong ka Pyndemumiong, Mairang bad la ïadon lang ruh ka Deputy Commissioner jong ka Eastern West Khasi Hills District, ki Pastor jong ka Balang, ki nonghikai, ki kmie ki kpa bad kiwei pat ki nongshah khot sgnewbha bad ki khynnah jong ka skul. U Kongsan u la pynhap noh ruh ïa ka lama jong kane ka Annual Sport Meet 2025.