Shillong, K’lyngkot, 08: U Myntri Rangbah ka Jylla Conrad K Sangma ha ka sngi Saitjaiñ, u la ong ba ka hukum jong ka ïingbishar Supreme Court ban pynsangeh ïa ka hukum ba shipor ka ïingbishar High Court ka jylla ban ym pat pyntreikam ïa ka Memorandum of Understanding (MoU) pynbeit pud hapdeng ka Assam bad Meghalaya tad haduh u bnai Kyllalyngkot 2023, ka long katkum ka jingkhmih lynti jong ka Sorkar.
Haba ïakren bad ki lad pathai khubor, u Conrad u la ong ba ka Sorkar ka la sngewthuh shai bha ba ka hukum ba shipor jong ka Meghalaya High Court kan sa shah pynsangeh ha ka ïingbishar Supreme Court.
“Ngi la leit mudui sha ïingbishar Supreme Court bad kumba khmihlynti, kane ka ïingbishar ka la pynsangeh ïa katei ka hukum bad ka la long katkum ka jingkhmih lynti jong ngi” ula ong.
Ha ka Sngi Thohdieng jong ka taïew baladep, ka ïingbishar Supreme Court ka la pynsangeh ïa ka hukum jong ka ïingbishar Meghalaya High Court ha kaba ïadei bad ka jingpyntreikam ïa ka MoU ba la ïasoi ban pynbeit pud hapdeng ka Assam bad Meghalaya, kaba ïadei bad ka jingphiah ïa u pud u sam bad ka jingpynïeng ïa ki mawpud hapdeng ki ar jylla.
Ka ïingbishar Supreme Court lyngba u Chief Justice of India (CJI) u DY Chandrachud, u PS Narasimha bad u JB Pardiwala ki la phah notis sha ki nongshah mudui halor ka jingkyrpad ban tuklar da ka Sorkar Meghalaya bad ka la buh tarik ban shong bishar kham bniah ïa kane ka kam hadien artaiew.
“U Single Judge um shym la ai ïa kano kano ka daw halor ka hukum ba shipor bad la ka MoU kan donkam ïa ka jingmynjur ka Parliament ka dei kawei pat ka kam ba hap khmih. Hynrei ka hukum ba pynsangeh ïa ka MoU kam pat donkam satia. Namarkata, ïa kane ka hukum ba shipor u Single Judge la pynsangeh noh,” la hukum ka ïingbishar Supreme Court.
Ha kawei pat ka liang, u Myntri Rangbah ula ong ba ka jingïakren pynbeit pud jong ka wat kaba ar ka la ïaid ha la ka jong ka lynti.
“Ngi la ïakynduh ïa shibun ki jingeh ha ki por ba la leit. Namarkata, ngi hap ban pynbeit ïa kine ki jingeh bad kito ki jingjia kiba la jia baroh lym kumta ngin ym lah ban jam shakhmat. Ngin ym lah ban pynlong ïa ka jingïakren” ula ong.
Haba kdew ïa ka jingsynreit kuli jong ki Pulit bad ki nongap pahara khlaw ka Jylla Jylla ïa ki paidbah ha shnong Mukroh kaba la jia ha ka 22 tarik, Naiwieng 2022 ka dei kawei na ki jyrwit jyrwat na ka bynta ka jingiakren pynbeit pud hapdeng ki ar jylla, u Conrad ula ong “Hynrei kane kam mut pat ba ka jingïakren kan sangeh noh, kam mut ruh ba ngin ym ïai buddien ïa ka kam pynbeit pud.”
Haba kular ba ka Sorkar jong u ka la kut jingmut ban buddien ïa ka jingïakren pynbeit pud bad ka Assam, u Myntri Rangbah ula ong “ngin nang ïai buddien ïa kane bad ngin pynthikna ba kan poi shaduh kaba kut. Dei tang ka NPP bad ka dei tang kane ka Sorkar kaba la shim ïa ka synjam ha kine ki 50 snem ban wad ïa ka lynti ban lah pynbeit noh ïa ka jingïakajia pud.”
“Ngi la lah ban leh ha ka wat kaba nyngkong bad ngi kyrmen ba lada ki paidbah kin ailad biang bad ai ka jingkyrshan ba pura ia ka NPP, ngin sa lah ban pynbeit ïa kane ka jingeh ha ka samoi ka ban sa wan,” ula bynrap.
