Shillong, K’lyngkot, 08: Ka skhim Mahatma Gandhi National Rural Employment Guarantee Scheme (MGNREGS) ka long ka skhim kaba ïarap da shisha ban kyntiew sted ïa ka roi ka par ha ki thaiñ nongkyndong namar lyngba kane ka skhim ka sorkar ka ïoh ban pyntrei bad ai kam ïa ki paid nongkyndong bad tang ha kine ki san snem ka jingpyntrei ïa kane ka skhim ka la kot sha ka 4500 klur tyngka lada ia nujor ha ki san snem mynshwa kaba long tang 2500 klur tyngka.
Haba wad jingtip bniah tang na kane ka skhim ki long ïing ha ka shisnem kim duna ka jingïoh kaba haduh 16,600 tyngka shisnem kaba la kiew bun shah ban ïaki snem kiba mynshwa kaba long lehse tang 9000 tyngka shisnem.
Haba ïakren bad uwei na ki heh sorkar u bym kwah ban pynpaw kyrteng ïalade u la ong “ Wat la ka jylla Meghalaya ka dei ka jylla kaba dang bun ki nongrep bad ka rep ka riang ka dei u bud lum jongka ïoh ka kot ha ka jylla hynrei ym ju don ki skhim ba kyrpang ban ïarap ïaki nongrep. Dei tad mynta ba ka sorakar ka la phai khmat sha ki nogrep bad pynmih da ka skhim FOCUS bad ka thong ka long ban kyntiew ïa ka rep ka riang bad kumno ruh ban pynïaid ïew ïa ki mar rep ba ki la ïoh lum na ka jingtrei shitom baroh shisnem”.
U la ïathuh ba kumba 5000 tyngka la ai sha ki long ïing kum ka grant ba kin kyntiew ïaka rep ka riang jongki. Ki don palat 2.7 lak ki nongrep kiba la ïoh jingmyntoi lyngba kne ka prokram bad mynta ki don ruh haduh 20,000 ki Producer Groups.
La ïathuh shuh shuh ban pynshlur shuh shuh ïa ki nongrep hadien ba la ïohi ba ki la kiew na ka skhim FOCUS la pynmih shuh shuh sa ka FOCUS + bad lyngba kane la ai shuh shuh sa 5000 tyngka sha ki nongrep lyngba ki Bank Account jongki.
Ryngkat kane ka Grant la ïarap shuh shuh ïaki nongrep ban ai jighikai pyntbit shuh shuh kumno ba kin rep kin riang ban kiew ka jingïoh bad kumno ruh ban die ne pynïaid ïew ïa ki mar rep mar riang jogki. Ban lait na ka jingshah khniot ha ki dor ki mur la thaw ruh ïaki jaka ban buh ïaki mar rep ba kin ym sniew kloi bad nalor kata la thaw ruh haduh 185 tylli ki Marketing Centers ha baroh kawei ka jylla.
Ki don bun ki mar rep ha ka jylla kiba la ïoh ka jingdawa na shabar ri kita kum u shynrai Lakadong, u Sying, Sohtrun, u Sohmarit. Nalor kane wat ka umngap, ka dud, ki doh sniang, doh masi, dohkha ruh ki dei kiba jur bha ka jingdawa ha ka jylla bad kiba hap ban thied na kiwei ki jylla.
Ban kyntiew pat ka jingpynmih ïa kine ka sorkar ka la sdang ia ka Mission Mode Project. Dei na kane ka daw ka la don ka Lakadong Mission, Piggery Mission, Paultry Mission bad ter ter.
Kum ka nuksa kat haduh 2019 ki don tang kumba 1000 ngut ki nongrep kiba ïoh jingmyntoi na u shynrai Lakadong hynrei lyngba kane ka Mission mynta ki don kumba 13,000 ki nongrep kiba la ïoh jingmyntoi na une u shynrai. Ka jingpynmih ka la kiew na ka 7000 matric ton sha ka 11,832 matric ton.
Lyngba ka Mission rep sying ki don haduh kumba 17,665 ngut ki nongrep kiba la ïoh jingmyntoi. Ha ka Mission ri sniang pat ka sorkar ka la ai jingïarap sha ki 253 tylli ki Cooperatives Society kiba la ïoh jingïarap ym duna ïa ka 44 klur tyngka.
Lyngba ka skhim PROGRESS la ai sha ki nongrep da ki khun sniang bad khun syiar ba kin ri kiba dei ki symbai kiba bha bad kloi ban san. Ka sorkar ka la mang 40 klur tyngka ban thied khun sniang bad 1 klur tyngka ïa ki khun syiar ban sam sha ki nongrep. La ju ai lai ki khun sniang kynthei bad uwei u khun sniang shynrang bad ki la don kumba 16,000 ngut kiba la ïoh jingmyntoi.
Ki bun kiwei kiwei ki missoin ba la pyntreikam kum ka Honey Mission, Milk Mission, Mushroom Mission, Aroma Mission, Spice bad Pineapple Mission bad ym duna ïa ka 25,000 ki nongrep kiba la ïoh jingmyntoi.
Kawei na ki thong ba hakhmat jongka sorkar MDA ka long ruh ban ïarap bad pynkhlaiñ bor shuh shuh ïaki longkmie kynthei khynnah. Lyngba ka Self Help Group (SHG) bad ryngkat ka jingkyrshan na ka National Rural Livelihood Mission ki la don kumba saw lak ngut ki longkmie kiba la ïoh jngmyntoi. Mynta ki don sa 36,000 tylli ki SHG kiba la thaw thymmai katba kat haduh u 2018 ki don tang 5800 tylli ki SHG.
