Ka FLN kan khring ïa ki khynnah ban wan sha skul, plie u MLA ïa ka kamra kyrpang ki khynnah ha Diwon Secondary School

Nongpoh, Nailur 02: Ka Diwon Govt. LP School kaba dei ka shnat jong ka Diwon Secondary School mynta ka sngi kala ioh ban plie paidbah ïaka Foundational Literacy and Numeracy (FLN) Classroom kaba dei kamra klas ba kyrpang ban khring ïaki heprit kiba dang sdang pule ba kin juh ban shong skul bad ban ai ka jinghikai kum kawei naki shlem pule ba kyrpang ban pyniar ïaka jingmut jingpyrkhat jong ki heprit kaba dei ruh shibynta jong ka National Education Policy 2020.
Ka jingthmu jong ka skul ban wan rah ïa katei ka kamra klas kaba thymmai ka dei halor ka jingangnud ban nang pynbha ïaka pule puthi bad ban wan rah ïaka pule puthi kaba kham janai (Quality Education) katkum NEP 2020, kane ka skul ka la shna ia ka kamra klas kaba kham kyrpang na ka bynta ban iarap ia ki heprit kiba dang pule haki kyrdan Nursery kaba ngi tip kum ka Foundational Literacy & Numeracy Classroom khnang ba ka skul kan lah ban pynïoh ïaki jinghikai kaba ngi ong learning with Practical, activities based Teaching lyngba ki ICT (Information Technology) katkum ka juk stad ba mynta.
Ïa katei ka FLN jong ka Diwon Govt. LP School, la wan ban plie paidbah mynta ka sngi da u Bah Mayral Born Syiem MLA ka Nongpoh kum u kongsan haka jingdonlang u Bah R Rizal SDSEO, Ri-Bhoi District, Bah K Tmung Chairman MC, Bah F Manih Headmaster, Bah B Tmung Rangbah Shnong, ki nonghikai, ki kmie ki kpa lem bad ki khynnah skul.
Haba kren ha katei ka sngi naka liang u Bah Mayral Born Syiem MLA ka Nongpoh u la pynpaw ka jingsngewkmen halor ka jingangnud jong ka sorkar pdeng lyngba ka National Education Policy halor ka jingdonkam ka Foundational Literacy and Numeracy (FLN) Classroom haki skul pule ban khring ïaki khynnah kumba la pynpaw da ki nonghikai ba ki khynnah kim kwah wat ban pep skul namar ki ioh ïa ka jinglehkmen, ka jingstad hakajuh ka por.
Ka jinglah jong katei ka Skul Diwon ban plie ïaka FLN class room kan ktik ïa ki jingmut jingpyrkhat jong ki khynnah bad kane kan wanrah ïa ka jingkiew ha ka jingwan jong ki khynnah sha ka school. Kane ka Kamra Klas FLN kan ai ka jinghikai kaba kham bha bad kaba paka ban seng nongrim ïa ka jingstad jong ki ba kin ioh ïa ka nongrim kaba khlaiñ haka liang ka jingnang jingstad naka bynta ka lawei kaba janai.
Naka liang u MLA ha katei ka sngi u la kyntu ruh ïaki khynnah ba kin minot bad lehbha haki jingpule jong ki namar tang kita kiba tbit bad kiba len lada ki ban poi sha ki kliar lum jong ka nam.
Ha katei ka sngi naka liang u MLA u la ïarap ruh da ki pangkha sha katei ka skul ba kan ioh ban buh ha manla ki kamra klas nalor kiwei kiwei ki jingdonkam ka skul kiba yn sa lah ban lehbha bad pynbha kham hadien.