Jowai, Nailur 02: Ïa ka taïew ki Samla Khristan ne ka ‘Youth Week & Youth Sunday-2024’, ïa kaba la buh beit buh ryntih da ka Jingïaseng Samla Khasi Jaiñtia Presbyterian (KJP) Assembly ban rakhe manla u snem kala poi noh sha kaba kut hynnin ka sngi U Blei 01 tarik u Nailur.
Ïa kane ka taïew la rakhe ha kylleng ki bynta jong ka Ri Khasi Jaiñtia bad kumjuh sha ki jaka rithor kiba hap hapoh ka jingpeit jong ka KJP Assembly, Kane ka taïew ki Samla la sdang naduh ka sngi nyngkong jong ka 26 tarik u Nailar bad pynkut hynnin ka sngi U Blei 1 tarik u Nailur, 2024 halor ka phang kaba ong “Ka Jinglong Synran” (Mathaios- 16:24).
Ha Balang Presbyterian Khimusniang, Jowai lyngba ka Jingïaseng Samla la rakhe ïa kane ka taïew ba kyrpang da kaba pynlong shibun ki prokram naduh ka sngi nyngkong (Monday) kiba kynthup naduh ka Jingïaseng Paidbah, ka Jingkren plie ïa ka Theme, Elocution Competition, Bible Quiz Competition, Singing Competition, nalor kiwei kiwei de.
Ha ka Jingïaseng Paidbah sngi U Trai haka por 1 baje nohphai sngi ïa ka khubor na ka ktien u Blei la sam da ka Rev. Rieweh Kupar Sutnga, uba la pynsngew halor jingeh naduh ka jingsheptieng bad ka jingkhynñiuh jong ka jingim briew ha kine ki sngi ba mynta. Ula ong ruh ba ki longïing mynta ki sngi ki don hapdeng ka jingsngewsih na kiba bun ki jingeh naduh ka jingkyrduh kam kyrdum jam bad ka jingbym ïadei jingmut. Kumta ula kyntu kum ki khun samla kin sdang ïa ka jingim da ka jingshlur khnang ba kin jop ïa ki jingïaleh
Ha kane ka jingïaseng la ïoh ruh ki jingrwai kyrpang na ka Choir jong ka Jingïaseng Samla ka Balang, katba haka por 7 baje jammiet kala don jingïaseng khawai jingrwai “Singing Festival”.
