Ka Fish Eco Hatchery kaba nyngkong eh ha ri India kaba pyntrei da ka VEC Lahaleiñ, EJH

Khliehriat, Rymphang, 11: Ka long kaba sngewtynnad ban tip ba ka Village Employment Committee (VEC) jong ka shnong Lahaleiñ, East Jaiñtia Hills District ba la lamkhmat da u Secretary Bah Laiman Dkhar bad u Chairman Bah Sparly Pohtam ka la pyntrei ïa kawei ka pung pynmih symbai dohkha ne Fish Eco Hatchery kaba lah ban pynmih haduh 10 million tylli ki symbai dohka ha ka shi snem.
Kane ka pung pynmih symbai dohkha ha ka shnong Lahaleiñ ka dei kaba nyngkong eh hapoh ka ri India.
Ka jinglah ban pynurlong ïa ka Hatchery ka dei lyngba ka jingbei tyngka na ka skim MGNREGA, ka tnat Basin Development Unit, East Jaiñtia Hills bad na ka ophis jong Block Development Officer Wapung C&RD Block. Ïa kane ka pung ri dohkha ba la shna kyrpang la plie paidbah ha ka sngi Thohdieng jong ka taiew baladep da ka MLA jong ka Sutnga Saipung Constituency ka Kong Santa Mary Shylla kaba la long kum ka Kongsan ryngkat ka jingsakhi lang jong u Deputy Commissioner u Abhilash Baranwal, kum u Symbud kongsan.
La aiti ïa ka Fish Eco Hatchery hapoh ka jingpeit jong ka tnat Fisheries EastJaiñtia Hills District, namarba dei ka tnat Fisheries East Jaiñtia Hills District hapoh ka jingpeit u Superintendent of Fisheries Bah Hubert Kharbuki kaba la peit bad khmih ha ka por ba pyntrei ïa ka project ha ka shnong Lahaleiñ.
Ka Kong Santa haba kren kum ka Kongsan ka la kyntu ïa ki nongshong shnong ba ki dei ban da pyndonkam bha ïa kane ban pynsngewthuh ïa ki briew ba kum kane ka projek ka don hapoh shnong bad kan dup lah ban kyntiew ïa ka ïew die dohkha ka ban wanrah jingmyntoi ha ka ïoh ka kot.
Ka la khublei ïa ka VEC Lahaleiñ bad kumjuh ruh ïa u Bah Lamsing Tyngsong uba dei u trai jaka ba kin nang kiew shuh shuh ha kane ka kam ri bad pynmih dohkha.
Ka la ong ruh ba kum ka Nongmihkhmat na ka thaiñ ka sngewthuh ïa ki jingeh jong ki paidbah ka thaiñ khappud bad sngewkmen ba mynta ka surok ruh la pyntrei shaid shaid, ka ïew khappud (Border Hat) kaba yn sa pyndep bad ka la ong ruh ba ka Sorkar kan sa wanrah shuh shuh ki lad pynroi ha ka thaiñ khappud ha East Jaiñtia Hills District.
U Abhilash Baranwal, u pynpaw ka jingsngewkmen halor kane ka jinglah ban pynurlong ïa kane ka pung pynmih symbai dohkha kaba dei ruh ka sien ba nyngkong eh ha ri India kaba la pyntrei da ka VEC Lahaleiñ bad u la ong ba kane ka dei lyngba ka jingai jingmut u Bah H.Kharbuki bad ka jingtrei shitom bad jingshimkhia jong ka tnat Fisheries, ka Basin bad ka C&RD Block Wapung.
“Nga kyrmen ba kane ka pung ri dohkha kan dup lah ban pynbiang ïa ki symbai dohkha ha baroh kawei ka district bad sha ki district jong ka jylla Assam kiba don marjan bad kane ka jaka. Nga kyrmen ba kane ka Eco Fish hatchery kan wanrah ïa ka lad ïohkam ïohjam bad kan kyntiew ïa ka kam khaiï ha ka shnong bad ha ka thaiñ hi baroh kawei,” ula ong.
U Bah Hubert Kharbuki, u la ïathuh ba kane ka Eco Hatchery ka dei kaba la pyntrei katkum ka jingaijingmut jong ka NFDB, Hyderabad bad kaba la plie lad bad ai ruh ïa ki Technical Specification kumno ban trei ïa ka kam.
“La rejister ruh ïa ka Lahaleiñ Fish Farmer Producer Organisation (LFFPO) hapoh ka NFDB Hyderabad bad la pyntrei ïa kane ka projek da ka VEC Lahaleiñ bad hap ban rejistar ïa kane sha Hyderabad kum ka shlem pynmih symbai dohkha khnang ba ki symbai dohkha kiba pynmih nangne kin long kiba bha ban sam sha kin nongrep dohkha hapoh ka district bad hapoh ka jylla.
Kane ka jingri dohka ka la sdang naduh u snem 2012-2013 da ka Meghalaya State Aqua Mission (MSAM) bad u Bah David Kharwanlang kum u Fishery Officer u dei uba peit ïa kane ka kam ha kine ki snem.
“Ngi la ai ïa ka skhim da ka FRP Hatchery kaba lah ban pynmih ïa ki symbai dohkha tang ar lak tylli ha ka shi snem, hynrei ka jingdonkam ïa ki symbai dohka ha East Jaiñtia Hills District ka kot haduh 10 millon tylli haduh 15 millon tylli ha ka shi snem. Kumta ngi la pyrkhat kumno ban wanrah bad pynbiang ïa kane ka jingdonkam hapoh ka district namar ki nongrep ki shem shitom ban ri ïa ki symbai dohkha kiba wanrah na shabar jylla kum na Assam na West Bengal namar ba kine ki symbai ki tlot bad haba ri ha ki pung ki ïap bad ynda ki ïap ka wanrah jingdohnong ïa ki nongrep dohkha,”u la ong.
“Ngi la pyrkhat ïa kane la bun snem bad ngi lap ba kane ka Farm ha Lahaleiñ ka dei kaba biang bha ban leh ïa kane ka projek. Kumta nga la ïakren bad u DC ha kaba u la pdiang ïa ka jingaijingmut bad mynta ngi la ïoh ïa kane ka Eco Hatchery ha shnong Lahaleiñ kaba la shna bha da ka dewbilat kaba lah ban pynmih symbai dohkha haduh 10 million tylli ha ka shi snem bad kan long ruh ka shlem aikam aijam ruh ïa ki paidbah hapoh ka district,” la bynrap shuh shuhb u Bah Kharbuki.
“Ynda la pyntreikam bha ïa kane ka Hatchery ngi donkam haduh 150 ngut haduh 200 ngut ki briew ki ban trei ïa kane ka kam ban kit bad die ïa ki dohkha shaduh Khliehriat, Ladrymbai, Sutnga, Jalaphet, Umkiang bad kiwei kiwei ki jaka namarba ha kane ka jaka ngi khlem buh thong ban pynmih tang ki symbai dohkha hynrei ngi la buhthong ruh ban pynmih ïa ki dohka ban bam bad nga ngeit ba ka jingpynmih ïa ki dohka nangne kan pynbiang ïa ka jingdonkam dohkha hapoh ka district,” ong shuh shuh u Bah Kharbuki.
Ïa ka Eco Hatchery la shna ha ka jaka jong u Bah Lamsing Tyngsong uba dei u nongshong shnong jong ka shnong Lahaleiñ uba dei uwei uba la pawkhmat bha ha ka kam ri dohkha ba la ithuh da ka Sorkar Jylla bad da ka Sorkar Pdeng. U don ka jaka ri dohka kaba heh bha haduh 2 hectare tam ha shnong Lahaleiñ ka shnong kaba don ha ki khappud bad ka ri Bangladesh.
La sakhi lang ha kane ka sngi, da u DPM Basin Unit East Jaiñtia Hills District Bah Hunlang Blah, u President ka East Jaiñtia Farmer’s Union Bah Danosha Tlang bad kiwei kiwei.