Shillong, Rymphang, 11: Ki shipai Border Security Force (BSF) kiba ap pahara ha khappud ka ri India bad Bangladesh ha ka shnong Muktapur, West Jaiñtia Hills District la kynnoh ba ki la sloit jubor ïa ka sopti bad byrngem siat ïap ïa u Dr. Seiboklang Buam uba dei u Officer Incharge jong ka Veterinary Dispensary, Muktapur bad uba long ruh u nongshong shnong jong ka shnong Muktapur.
Kane ka la jia ha ka sngi U Blei ha ka por 12:05 baje noh sngi katba u Dr. Buam u dang thmu ban leit khwai dohkha na wah Lakroh kaba don ha khappud ka ri Bangladesh bad kaba jngai 2 kilomitar na Muktapur na ka surok Muktapur-Jaliakhola kaba hap hapoh u pud u sam jong ka BSF, Border Out Post Hawaitila.
Ha ka ejahar ba la mudui da u Dr. Seiboklang Buam sha ki Pulit ka Muktapur PPP, u la kynnoh ba uwei u shipai BSF uba la tip kyrteng kum u Rejendra Kumar bad uwei u shipai BSF bym lah ban tip kyrteng ki la bat ïa u hajan ka Shiv Mandir, Hawai Tilla ha Lakroh.
“Katba nga dang ïaid lynti ban leit khwai sha wah Lakroh, ki shipai BSF ba la jer kyrteng haneng tang shu ïohi ïa nga ki la pynsangeh bad sdang ban tohkit ïa nga la nga dei u nong India ne u nong Bangladesh. Hadien ba nga la jubab ïa ka jingkylli jong ki, khnang ban buh ïalade ha ka jingshngaiñ, nga la ring video da ka mobile phone ïa ka jingïakren jong ngi. Tang shu ïohi ïa kane (ba nga ring video) ki la sdang ban ktah kti bad byrngem ban siat ïap ïa nga bad patrong shajan u mawpud (Zero Point) ba pynïakhlad ïa ka India-Bangladesh bad nalor kata, ki la knieh ruh ïa ka mobile phone kaba dang don ha ka kti jong ki tad haduh kane ka khyllipmat ba la ujor ïa kane ka ejahar,” la ong u Dr. Buam ha ka ejahar.
“Katba ki dang patrong ïa nga sha Zero Point Indo-Bangladesh, nga la pyrta jingïarap bad donbok ba arngut ki kynthei bad uwei u nongshong dukan uba don hajan ha kata ka por u la ïohsngew ïa ka jingpyrta jong nga ki la wan ïarap ban ïakren bad ki shipai BSF ban pyllait ïa nga. Hynrei wat ha kata ka por, ki shipai BSF ba la kdew haneng ki la phah panmap ïa nga da kaba ktah ïa ki kjat jong ki bad pyrshang ruh ban sloit jubor ïa ka sopti bad ïa ka patlun ban pynïaid lyngkhuid ïa nga,” la ong shuh shuh u Dr. Buam.
Ha ka video ba la saphriang ha ka social media, u Dr. Buam u la ong ruh katba u dang ïa nia bad ki shipai BSF hadien ba ki la kynnoh ba u dei u nong Bangladesh, ma u ruh u la pynphai nia balei ki shipai BSF kim beh ïa ki nong Bangladesh kiba ju sharai masi hajan u mawpud bad ka shnong Muktapur.
Halor ka jingphah panmap bad phah nguh ïa ki kjat da ki shipai BSF, u Dr. Buam u la ong, “lada don kaei kaei kaba bakla nga kloi ban map hynrei ban nguh haduh ka kjat te ngam lah.”
