Plie u Myntri ïa ka jaka hikai ri dohkha ha Khliehriat, jurip jaka rep sohñiamtra

Khliehriat jymmang 17 : U myntri ka sorkar Meghalaya, uba dei peit ïa ka kam rep bad ka kam jngohkai pyrthei, u T.D.Shira, hynnin ka sngi u la plie paidbah ïa kawei ka jaka ai jinghikai kaba don ha ophis jong u Superintendent of Fisheries ha Khliehriat ka ban ai jinghikai ïa ki nongrep dohkha kiba na East Jaiñtia Hills District.
Ha kane ka sngi u myntri sorkar u la jurip ruh ïa ki jaka rep dohka ha Khliehriat, ha Kongong kumjuh ruh ki jaka rep soh ñiamtra kiba ha shnong Narwan.
Shuh shuh, hadien ka jingialang bad ki nongrep soh ha Clarin Resort Narwan, u myntri sorkar u la sam sha ki nongrep ia ki tynrai dieng soh bad ka sboh sha ki paidbah nongrep, shuh shuh hadien kane u la leit jurip ruh ïa ka kper soh jong u bah Self Daniel Lyngdoh kaba don ha Moopala ha ka dong Mookhlot ha kaba ha kane ka jaka ki don haduh kumba 20 hajar tam ki dieng doh ñiamtra kiba u bah Self Daniel Lyngdoh u la thung ha ka jaka kaba heh haduh 100 akar tam, nalor ki soh ñiamtra u la thung ruh bun jait ki dieng ba kynthup ki dieng soh Jamun, avocado, ki dieng Malysian teak bad kiwei kiwei ki jait dieng.
Ha ka jingialang ba lyngkot ba la pynlong ha ophis u Superintendent of Fisheries ha Khliehriat, u myntri sorkar, u T.D Sira u la kular ban iarap ïa ki nongrep dohkha katba lah ka bor, u la ong ba ka sorkar ruh ka sngewthuh ïa ka jingmad jingeh ki paidbah na ka daw ka jingkhang dewïong hynrei ki don kiwei kiwei ruh ki lad kamai ki ban iarap ia ki paidbah kum ka kam rep dohkha, kaba rep soh, ki kam ba ïadei bad ka kam jngohkai pyrthei bad kiwei kiwei ruh.
U Deputy Commissioner ka East Jaiñtia Hills District, u Manish Kumar, IAS u la buh ka jingkyrpad ïa u myntri sorkar, u T.D.Shira ban theh shuh shuh ki lad jingiarap da kaba wanrah bun ki project hapoh ka district bad ruh da ka jingtreilang bad ki MLA ba kynthup u bah Kyrmen Shylla bad ka kong Santa Mary Shylla lem bad ki heh sorkar yn lah ban kyntiew ïa ka ioh ka kot ha ka district, u la pynpaw bad ong ba kane ka district ka donkam bha ki lad ban kyntiew ïa ka ioh ka kot namar ki paidbah ki la shah ktah ha ka jingkhang naduh ba khang ban tih bad shalan ïa u dewïong.
Na ka liang u bah Dominick Pakem, uba dei uwei na ki nongrep dohkha uba la kren ha ka jingialang, u la ong ba ki nongrep dohka ki mad jingeh ha ka kamai kajih na ka daw ka jingshah khang dewïong bad shuh shuh ruh ka jingduna ka mang tyngka kaba wan na ka sorkar na ka bynta ban shna ïa ki pung dohkha ha kaba ki lad jingiarap ba ki ioh kam iahap bad ka jinglut ha ka jingpyntrei ïa ki pung dohkha namar ka jinglong jingman ka jaka ha ka thaiñ kam iadei dur bad ki jaka madan kiba ha ri thor.
Kiba la ai jingkren ha ka jingialang ki kynthup ruh ka MLA Sutnga Saipung, ka kong Santa Mary Shylla, u Superintendnet of Fisheries East Jaiñtia Hills District, u bah Hubert Kharbuki bad kiwei kiwei.
Ha ka jingleit jurip ïa ki jaka rep soh ñiamtra bad ki jaka rep dohkha, u myntri sorkar u la ai ka jingiaroh ïa ka jingitynnad bad jingheh ki pung rep dohkha bad ki jaka rep soh ñiamtra kiba don ha shnong Narwan bad ka jaka rep jong u bah Self Daniel Lyngdoh ha East Jaiñtia Hills District bad u la sngewthuh ruh ba ki nongrep dohkha ki shim khia bad sngewtynnad ïa kane ka kam.
Haba kren hal or kumno ban kyntiew ïa ka kam rep dohkha, u la ai jingmut ba ka donkam ban pynrung ruh ïa ki buit treikam ba thymmai ban kyntiew ïa ka jingpynmih dohkha bad u kyrmen ba ka jingpynmih dohkha kan kiew nangne shakhmat.
Na ka liang u bah Kyrpadmi Dkhar uba na ka shnong Wapungshong uba don ka jaka rep dohkha ha Kongong, u la iathuh ba u dang shu sdang ban rep dohkha dang shen bad u la ioh ban die ïa ki dohkha haduh 15000 kilo ha ka shi snem bad u kyrmen ban un sa nang lah ban pynmih shuh shuh ia ki dohkha, u kyrpad ïa u myntri sorkar ba un sngewbha ban iarap lem ban kyntiew ïa kane ka kam namar ba u kwah ruh ban pynitynnad shuh shuh ïa kine ki jaka ba u don ki pung dohkha bad ban pyn wandur bha ban dup lah ban pynlong kum ka Aqua park, kumjuh ruh u la ai khublei ïa u Superintendent of Fishiries, u bah Hubert Kharbuki lem bad ki nongtrei jong ka tnat kum u bah Bonty Biam bad kiwie kiwei kiba la ju iarap ban ai jinghikai ïa u ha kane ka kam rep dohkha.
Uwei na ki nongrep soh ñiamtra uba na ka shnong Narwan, u bah Mewan Shadap, u la iathuh ba u ioh lum pisa haduh T 900000/- lak tyngka tang na kaba die soh niamtra bad ïa ki soh la die ym tang hapoh ka thaiñ ne hapoh ka jylla hynrei la ioh ruh ban phah wat shabar ka ri India kata sha Dubai lyngba ka jingiarap ka tnat MBDA bad la pynpaw ruh ba ka jingioh kheit slem ïa u slem kata haduh u bnai lber ka iarap shibun ha kaba kyntiew ïa ka ïew die soh ñiamtra.
Kiba la ïa don ryngkat lang ha ka jingialang bad ha ka jingleit jurip u myntri sorkar ki kynthup ka Director jong ka tnat Fisheries, ka kong Aitinolin Lyngdoh Mawlong, u Superintendent of Fisheries West Jaiñtia Hills District, u bah P.S.Suting, ki paidbah nongrep kiba napoh ka district lem bad ki heh sorkar kiba napoh ka district.