Ka elekshon ha JHADC kam long satia kaba khuid kumba kam ka sorkar jylla, ong u Bah Ardent

Shillong, Lber 03: U MLA ka Nongkrem na ka seng VPP u Bah Ardent M Basaïawmoit u la ong ba ka elekshon MDC 2025 ha JHADC kam long kaba khuid kumba kam ka sorkar jylla, namar ba lada ka elekshon ka ïaid beit ïaid ryntih ka VPP kan ym jop tang 8 ngut hynrei ka lah ban bat ïa u lakam synshar ha JHADC bad u la ong ba ka elekshon kaba ïaid beit ïaid ryntih ka dei tang ha KHADC.
Halor kane haba ïashim bynta ha ka jingïatai halor ka jingkren u Lat hapoh ka ïing dorbar mynta ka sngi, u Bah Ardent ula sei ïa kiba bun ki polling station ha kaba ka jingïoh vote jong u kyrtong ba kyrshan u rangbah shnong ka la wanrah ka jingsuba jur ïa ka jingïaid beit ka elekshon MDC.
Ha kaba ïadei bad kane u la buh jingkylli ïa u Myntri Rangbah hato u sngew tynnad ban thiah suk haba ki briew kim ïoh ban jied ïa ki nongmihkhmat da kaba suk kaba jai jai. U Bah Ardent ula wanrah ruh ka ejahar kaba la ujor pyrshah ïa ka jingshah byrngem ha ka jingthep vote MDC ha Jaiñtia Hills.
Halor kane u la ïathuh ba la dep pyntip lypa sha ka bor district ïa ki jaka thep vote kiba lah ban wanrah ka jingkulmar hynrei kaba sngew lyngngoh ka long ba khlem leh eiei da ka bor ba dei peit.