Shillong, Lber 03 : U Myntri ka tnad pule puthi ka sorkar jylla, u Rakkam A Sangma ha ka sngi Nyngkong u la pyntip baka sorkar jylla ka dang ap mynta ïa ka jingpyllait pisa ha ka sien kaba lai (third installment) na ka sorkar pdeng kaba ïadei na ka bynta ka bai bam ne ka scholarship jong kumba 20,000 ngut ki samla pule ka jylla.
Haba kren bad ki lad pathai khubor, u Myntri u la ong, “Mynta ngi dang ap ïa ka sorkar pdeng ba kan pyllait noh ïa ka pisa ha ka sien pyllait kaba lai namar ïa ka sien pyllait kaba ar la dep ban pyllait. Kumta ngi khmih lynti ba kin pyllait noh kham kloi,” ong u Myntri.
Katkum ka jingïathuh jong u, ka jylla ka don palat 60,000 ngut ki samla pule bad na kine kumba 40,000 ngut ki la dep ban ïoh bad kiba sah mynta ki don sa kumba 20,000 ngut ei ei ban ïoh lyngba ka sien pyllait pisa ha ka sien kaba lai na ka sorkar pdeng.
