Ïap ka masi ba shah bat bording ha Warmawsaw, dei ka jingleh torti ka MeECL

Nongpoh, Lber 03: Kawei ka masi kala iap hashen hadien ka jingshah bat bording elektrik ha uwei u transformer ba khlem jingker haka shnong Warmawsaw haka thaiñ Ri-Bhoi Sepngi.

Katkum ka khubor bala ioh lum la ong ba kane ka jingjia kala jia mynta ka sngi ha kaba la suba ba katei ka masi kala leit ban bam phlang hynrei kala kum leit sha katei ka jaka don utei u transformer ba khlem jingker bad shah bat bording haduh ba kan da iap syndon hajuh.

Halor katei ka jingjia naka liang ka RBYF Warmawsaw Circle lyngba u samla Armour Mawblei President u la ong ba kum ka seng ka dap da ka jingsngewkhia halor katei ka jingjia bad katei ka dei tang ka jingleh torti jong ka tnad MeECL kaba la buh ïa utei u transformer khlem jingker ha katei ka shnong bad kane ka long ruh ka jingma kaba khraw wat ïaki briew kaba lah ban wanrah ka jingjia ba sngewsih ha kano kano ka por.

Hadien katei ka jingiap ïa katei ka masi naka liang ka seng kala ai por 5 sngi ïaka tnad MeECL ba ka dei ban ker mardor ïa utei u transformer ban lait na kano kano ka jingjia ba sngewsih hadien habud.