Ka dei ka por ba biang tam ba ki paidbah kin ailad ïa ka VPP ha kane ka election MDC: Dr. Ricky AJ Syngkon

Nongpoh, K’lyngkot 04: Haba kren kum u General Secretary ka VPP bad uba dei ruh u MP ka jylla ha ka jingïalang kaba la long mynta ka sngi ha Umsning, ba ka party VPP ka la pynithuh paidbah ïa ki kyrtong ban ïa khun ha kane ka election MDC na ki 5 Constituency kiba don ha Ri Bhoi District, u Dr. Ricky AJ Syngkon, u la ong, “Ba ka la dei ka por kaba biang tam ba ki paidbah ka jylla kin kin ailad noh ïa ka party VPP ha kane ka election MDC ka ban sa long ha ka 21 tarik u Rymphang 2025, khnang ba ka party VPP kan ioh lad ban pyntreikam ïa ka thong ban wan rah ïa kata ka jingkylla hapoh ka jylla”.
Haba pan ïa kata ka jingkyrshan ba radbah na ki paidbah ka Ri-Bhoi ïa kitei ki 5 ngut ki kyrtong ka VPP na Ri Bhoi, u Dr. Ricky AJ Syngkon, u la ong kane ka juk ba mynta kam dei shuh ka juk ba ki paidbah ki dang shah pynbiej sah ne dang biej bad kum ki paidbah ki dei ban long kita kiba stad ban jied ïa kita ki nongmihkhmat na ka bynta ka jingkylla kaba ngin ioh ïa kata ka jingsynshar kaba khuid.
U la ong ruh ka bor ka dei jong ki paidbah ïano ki kwah ban pynkup bor ïa kata ka jingsynshar ha ki 2 tylli ki District Council bad na ka liang ka VPP ka kyrpad da ka mynsiem kaba sngewrit bad ka mynsiem jong ka jingsngewkhia ba ki paidbah kin pynkup bor lem ïa ka party VPP khnang ba ka VPP kan ioh rung ha kitei ki District Council na ka bynta ka jingsynshar kaba khuid bad ruh kaba u paidbah un dup ioh jingmyntoi.
Shuh shuh, u la bynrap ruh da kaba ong, ka thong jong ka party VPP lada ki paidbah kin pynkup bor ka long ban wan rah ïa ka synshar kaba khuid ha kitei ki 2 tylli ki District Council bad ka party VPP kan pynshongdor ruh ïa kata ka jingsynshar kaba dei katkum ka nongrim Blei, u la bynrap.