Ka bording electrik ka dei ka jingshakri ba hap ban peit bha namar ka ktah ïa ki longïing: Conrad

Shillong, Jylliew 23: U Myntri Rangbah Conrad K Sangma mynta ka sngi ula pynïaid ïa ka jingialang bishar kam ha State Guest House, Taraghar, Shillong ban bishar ia ki kam ba iadei bad ka jingsam bording elektrik, ka rukom ai bill bad ka jingud jingnam jong ki nongthang bording ha ki jaka bala pyniaid da ka SAI Computers hapoh ka jingpynbeit Distribution Franchisee jong ka Meghalata Power Distribution Corporation Limited (MePDCL).
Ha kane ka jingialang la wan iashimbynta da u Chairman-cum-Managing Director, MeECL, Sanjay Goway, ki Heh Ophisar ka MePDCL, ki nongmihkhmat ka SAI Computers bad kiwei ki Ophisar kiba don bynta ha ka kam.
Ha ka jingialang, ka SAI Computers kala ai ia ka jingbatai kaba bniah halor ka jinglong jingman jong ki kam ba ka pyniaid ha ki jaka ba aiwai sha ka (franchise area), haba pynpaw ia ki jingeh kiba la ioh pateng na ki rukom pyniaid ba hashuwa, kynthup ka jingbun ki meter ki ba thut treikam, ki jingtei kiba la rim, ka jingsniew ki transformer, ki jingtan bording khlem meter, ka jingduna ha ka jingkhein ia ki nongthang boding bad ki kam ba iadei bad ka jingai bill.
Ki Ophisar kila pyntip ia u Myntri Rangbah ba ki bun bah na ki nongthang bording ha ki jaka ba aiwai (franchise area) kiba dei jong ka kyrdan Below Poverty Line (BPL) bad bun ki meter ha ki jaka ba dang aiti thymmai ki dei ki bym treikam shuh ha ka por ba shimti ban pyniaid ia ka kam. Kila pynpaw ruh ba ki jingpyrshang kila iaid shaid shaid ban bujli ia ki meter kiba la sniew, ban pynbha ia ki jingtei ba iadei bad ban weng ia ki jingeh kiba la slem bha kiba kwah ia ka jingsam bording.
Haba pynpaw ia ka jingsngewkhia halor ki jingujor u paidbah ba iadei bad ka bill boring elektrik kaba heh bad ka jingbym thikna ka jingioh bording, u Myntri Rangbah ula ban jur ba ka jingshaniah ki nongthang bording bad ka jingai jingshakri ka dei ka ban long ka ba kongsan tam.
“Ka bording electrik ka dei kawei na ki jingshakri paidbah kaba hap ban khmih bha namar ka ktah beit beit ia ki longiing man la u bnai. Lada ki paidbah ki siew ia ka bai boring kaba heh bad kim ioh ia ka bording kaba lah ban shaniah, kan don beit ka jingbym sngewtynnad.Ngi hap ban sngewthuh ia ka jingsngewkhia jong u paidbah bad ban leh eiei mardor” ula ong.
U Myntri Rangbah ula pynpaw ba katba ka Franchisee ka lah ban ioh pateng ia kiba bun ki jingeh na ki rukom pyntreikam, ki nongthang bording ki dei ban long kiba hakhmat eh haba khmih ia ka rukom ai jingshakri kaba ki ioh. Namar kata, ula bthah ia ka SAI Computer bad ka MePDCL ban shim ia ka lynti kaba kham phaikhmat sha ki nongthang bording haba pyntreikam ia kino kino ki jingpynkylla.
“Ki paidbah kim tip satia mano ba ioh pateng ia ki jingeh. Ki kwah ia ka jingshakri kaba bha. Namar kata, ka jingpynleit jingmut ka dei ban long nyngkong eh ha kaban pynbha ia ka jingsam bording, bujli ia ki transformer bad meter, bad pynkhlain ia ki jingtei. Shisien ba ki paidbah kila sdang ban iohi ia ka jingjanai, ka jingshaniah kan sa wan” ula ong.
Haba kren halor ki jingujor ba iadei bad ki jingiakren bad ki nongthang bording, u Conrad ula ban jur ia ka jingdonkam ka jingiakren da ka akor ka burom bad ki paidbah bad kyntu ia ka Franchisee ban pynkhlain ia ka jingiakren bad ka jingleit iakynduh ia ki nongthang bording.
“Ki briew jong ngi kiba shisur shidur.Lada phi kren ia ki da ka akor ka burom, kin jubab ia phi da kaba bha. Lada ka don ka jingbym iasngewthuh, ka jingbym iasngewthuh jingmut kan nang heh. Ban tei ia ka jingshaniah bad ki nongthang bording ka dei kaba kongsan bha ha kane ka khyllipmat” ula ong.
U Myntri Rangbah ula bthah ia ka Franchisee ban leit pynlong ia ki prokram pynsngewthuh paidbah sha kylleng ki jaka bad pyniadon bynta lang ia ki nongialam jong ki thain, ki Nongmihkhmat Balang, ki Sengbhalang, ki Nonghikai bad ki kynhun bapher bapher ba kin batai ia ki jingeh bala pynbeit, ka jingpynbha bala shim bad ka por bala buh ban pyntreikam. Ula ai jingmut ruh ia ka kompani ban pan ia ka jingai jingmut u paidbah bad ban leh eiei ia ki jingeh jong ki hapoh ka por kaba biang.
“To ngin pynbeit shuwa ia ki jingeh.Ngi hap ban sngewthuh ia ka jingsngewkhia u paidbah bad ban iatreilang ban ai ia ka jingshakri ba kham bha.Ngi dei kawei ka kynhun bad ka thong jong ngi ka long ban pynthikna ia ka jingai bording kaba lah ban shaniah sha u paidbah” ula ong.
U Myntri Rangbah ula kular ia baroh ki kynhun ba don bynta ba ka Sorkar Jylla kan iai bteng ban kyrshan ia ka jingkynshew ha ki jingtei pynmih bording, kynthup ki sub station, transformer, bad kiwei kiwei ki jingpynbha. Ula pynpaw ba ka Sorkar ka iai kut jingmut ban pynkhlain ia ka kam pynmih bording bad pynthikna ba ki nongthang bording ki ioh ia ka bording elektrik kaba shaniah bad kaba lah ban siew