Namar ba pyndonkam buit thymmai ban lap ïa kiba don Breast Cancer
Da ka SKOCH Award 2026 ïoh ka Health Department
Shillong, Jylliew 24 : Ka Tnad ka Koit ka Khiah ka sorkar jylla, ka la ïoh pdiang ïa ka khusnam kaba don burom kaba la tip kum ka SKOCH Award 2026 halor ka rukom treikam ba thymmai jong ka ba tip kum ka -“Transforming Breast Cancer Screening in Meghalaya Using Artificial Intelligence.”
Ïa kane ka khusnam la sam ha ka 20 tarik Jylliew 2026 ha ka jingïalang kaba 108 jong ka SKOCH Summit – Public Policy Forum halor ka phang “Regulatory Framework for Viksit Bharat,” kaba la long ha PHD Chamber of Commerce and Industry, New Delhi.
Ïa kane ka khusnam la leit ban pdiang na ka bynta ka Tnad da ka Dr. (Mrs.) Carolinda Iangrai, Additional Director of Health Services (MCH & FW)-cum-State Nodal Officer, NP-NCD, NHM Meghalaya, ryngkat u Tenneychell Khongrangjem, State Epidemiologist-cum-State Programme Officer, NP-NCD, NHM Meghalaya.
Kane ka projek ka pyndonkam ïa ka kor Artificial Intelligence (AI)-based thermal screening technology ban ïarap na ka bynta ban lap kham kloi ïa ka jingpang Breast Cancer, khamtam hapdeng ki kynthei kiba shong ba sah ha ki jaka kiba jngai bad kiba duna ki jingshakri ha ka jylla.
Ïa kane ka prokram la pyntreikam kum shi bynta jong ki jingpyrshang paidbah jong ka Meghalaya ban pynkhlaiñ ïa ki jingshakri ha ka jingai jingsumar kaba ïada lypa ïa kane ka jingpang. Ka prokram ka kynthup ïa ka jingleit sha ki paidbah sha ki shnong, ka jingtest, ka jingphah leit sha ki jaka sumar ba dei, bad ka jingbuddien khnang ban pynthikna ïa ka jinglap bad jingsumar ha ka por kaba biang.
Katkum ka kyrwoh la ong ba ki la don kumba 1,683 ngut ki kynthei kiba la dep shah test hapoh kane ka sien pyrshang, bad ïa kiba la lap ba ki don ha ka jingma kaba kham jur la phah sha ki jaka sumar ban leh ïa ka jingbishar bniah shuh shuh.
Ka Tnad Health & Family Welfare ka ainam ïa kane ka jingithuh bad ka khusnam sha baroh ki nongtrei ka koit ka khiah, ki nongtrei ba hakhmat eh jong ka tnad kiba la trei shitom bad aiti lut met bad mynsiem ban pynurlong ïa kane ka projek.
Ka Tnad ka pynpaw biang ïa ka jingangnud jong ka ban bteng ban wanrah ïa ki buit thymmai, kiba shong nongrim ha ki sakhi bad kiba pyndonkam ïa ka teknoloji, ban pynbha ïa ka jingai jingshakri ha ki kam sumar bad ka koit ka khiah jong ki paidbah ka Meghalaya.
Kane ka long katkum ka kyrwoh ba la phah da ka ophis u Under Secretary ka tnad ka Koit ka Khiah ka Jylla.