Nongpoh, Jymmang 16: Ban tip kham bñiah ïa ki jingpyntei ïa ki surok kiba hap ha ki shnong bapher bapher ka Umroi Constituency, u MLA ka Umroi Constituency u Bah Damanbait Lamare lem bad ki ophisar na ka tnad PWD ha ka sngi Thohdieng ki la leit ban jurip ïa ki surok ba shna thymmai ba la mang pisa T. 60 klur tam ba la pyntrei ha ki shnong bapher bapher.
Ha kane ka jingleit jurip ïa ki jingpyntrei ïa ki surok la don lang u Bah D. Laloo, EE PWD Umsning Division, u SDO ka PWD Bhoirymbong lem bad kiwei de ki ophisar sorkar.
Haba kren sha ki lad pathai khubor, u Bah Damanbait Lamare kum u MLA ka Umroi, u la pyntip ba ka jingthmu ba la pynlong ïa kane ka jingjurip ïa ki surok ka long ban pynthikna ba ka jingpyntrei ïa ki surok ka dei ban ïaid shakhmat ha ki shnong ba hap ha Umroi Constituency.
U la ïathuh ruh ba ki surok ba la ïoh ban pyntrei ha ki shnong ha Umroi Constituency ka la kot sha ka 44 km bad ba la mang haduh T.60 klur tam bad kine ki shnong ki kynthup ïa ki shnong na ka thaiñ Bhoirymbong sha ka thaiñ Umket bad ruh shaduh ki shnong ba hap ha ka thaiñ Mawbseiñ.
U la ong ruh ba kum u MLA u dap da ka mynsiem jong ka jingsngewkmen ba ha kane ka jingleit jurip la lap ba ka jingpyntrei ïa ki surok ka la ïaid shaid shaid bad u kyrmen skhem ruh ba ka jingpyntrei ïa ki surok yn lah ban pyndep ban siang rong ha ka por kaba biang tang shu dei ka por ba la duna slap, khnang ba kan ai jingmyntoi ïa ki paidbah nongshong shnong ka Umroi Constituency.
Shuh shuh, ha kane ka sngi, na ka liang u MLA u la bthah ruh ïa ki ophisar ka tnad PWD ba kin kham shna bha ha ki jaka ba ïaid u pipe um ka tnad PHE khnang ba kan nym ktah ïa ki umbam umdih bad ruh ba ka surok kan skhem bad neh slem, u la bynrap.
