Shillong, Jymmang 16 : Khnang ba kan long ka jingmyntoi kaba khraw ïa ki nongshong shnong ka Jylla ban ïoh ïa ki jait jingsumar bapher bapher ïa kiba pang dohnud, ka Apollo Hospitals Chennai ka la pynbna ba ka la plie ïa ka Liver Clinic ha Shillong.
ïaka Shillong Liver Clinic jong ka Apollo yn khlieh da u Dr Elankumaran, Senior Consultant bad Head jong ka tnat Liver Transplant jong ka Apollo hospital Chennai.
Kane ka Centre kan ai jingmyntoi ïa ki paidbah ka Jylla Meghalaya bad kiwei ki Jylla ka thaiñ Shathei Lammihngi ba kin ïoh ïa ka jingsumar pang dohnud namar kim donkam shuh ban leit phah sumar sha kiwei pat ki Jylla jong ka Ri India.
“Da ka jingsdang ïa ka Shillong Liver Clinic, ka jingkular jong ngi ka long ban pynïar ïa ka jingai jingsumar pang dohnud kaba tbit. Ka jingïarap ha ka por kaba biang ka ba lah ban pynim ïa ka jingim briew bad ka thong jong ngi ka long ban pynthikna ba ki nongpang na kane ka thaiñ kin ïoh ïa kajuh ka jingsumar kumba sumar haki nongbah baheh jong kiwei ki Jylla ka Ri India” la ong u Dr Elankumaran.
U Dr Elankumran u la ong ba ka Shillong Liver Clinic ka dei ka jubab ïa ka jingkiew jong ki jingpang dohnud ka ban ïalam sha kiwei ki jingpang kum ka viral hepatitis (B & C), ka jingpang dohnud kaba ïadei bad ka kyiad, bad ka jingpang non-alcoholic steatohepatitis (NASH) ha kane ka thaiñ.
U la bynrap ba ka jaka sumar ka ai ïa ki jingpeit bniah ba kham halor, ka jingbishar bniah ïa ka jingpang, bad ka jingbuddien hadien ba la leh Transplant kaba long kumjuh bad ka rukom sumar hapoh ka Apollo Hospital Chennai.
U Dr Elankumran u la ong ba ka Shillong Liver Clinic kan long kum ka jaka bishar bniah bad phah sumar ha ka thaiñ, kaban pynïasoh ia ki nongpang sha ka jingsumar ba kham tbit.
Ka Centre ha Shillong ka don ïa ka FibroScan kaba biang tam kaban pynlah ban leh ïa ka jingpeit bniah kaba thikna bha ïa ka jingpang dohnud ban lap kloi bad ban sumar ïa ka jingpang.
