Shillong, Jymmang 16: Ka sorkar jylla ka la sdang ïa kiba bun ki projek na ka bynta ban thung bad rep ïa ki tynrai dieng ban pynmih ïa u coffee bad cocao kaba long ruh kum shi bynta ban ai ïa ka lad kamai ïa ki nongshong shnong bad ban ïada ruh ïa ki tyllong umbam umdih kiba don ha kylleng ka jylla.
Haba ïathuh ïa kane ha ka sngi Thohdieng, u Myntri ka tnat Soil & Water Conservation u Marcuise N Marak u la ong ba dangshen u la leit ban jngoh ïa ka arabeca coffee plantation ha North Tura bad ka Cocao plantation ha ka shnong Aguragri.
Ïa kine ki project la pyntrei da ka tnat soil & water conservation.
“Ha kane ka jingleit jurip la ïohi ïa ka jingmih bha jong u coffee. Nga la ïakren bad ki nongshong shnong bad kren ruh shaphang ka jinglong kongsan ban thung ïa u coffee,” ong u Marak da kaba bynrap ruh ba ka jingthung ïa u coffee la leh ruh ha East Khasi Hills, Ri Bhoi bad Jaiñtia Hills.
“Ngi don ka lad kaba biang bha ban thung ïa arabica coffee, uba don bun ruh ki jait bad ngi la thung ha kane ka jylla bad ba la thung ruh mynta ha Garo Hills,” u la bynrap.
Haba kylli u Myntri u la ong, “Balei ba ka soil and water conservation ka la shim khia ïa kane ka kam ka long ban ïada ïa ki wah duid bad ki tyllong umbam umdih kiba ïaid lang ryngkat bad ki skhim umbam umdih.”
“Ka shnong ha North Tura kadei ka tyllong um jong ka wah Ganol, ha kaba la pyndonkam ïa ka Tura Supply Scheme. Kiba bun ki water supply scheme ki shaniah beit na ka wah Ganol,” u la pyntip.
Shuh shuh u Myntri u la pyntip ruh ba ka sorkar ka la wanrah bun ki projek na ka bynta ban pynthymmai bad ban ai ki jingkamai ïa ki paidbah lyngba ki tnat bapher bapher kum ka agriculture, horticulture, forest, MBDA, C&RD.
U la pynbna ruh ba na ka liang ka Cadbury company ka la dep ban ai dak ba kan long kawei na ki nongthied kaba heh bha ïa ki tiar ba la pynmih na jylla halor ki jingthung cocoa plant.
“Kane ka jait jingthung ka la ïaid bha ha Aguragri, bad la ïohi ba ki la don ki jingmih ki soh bad ïa kane la dep ruh ban ïathuh sha u Myntri Rangbah ka jylla naba kane kan ai ka lad jingmyntoi ïa ki nongshong shnong,” bynrap u Marak.
