Donkam ïa ki nonghikai ban don bynta lang ha ka kam ïalap pyrshah drok: Director DSEL

Shillong, Jymmang 16: Ka Workshop halor ka DREAM Project, ka jingjied ïa ki Counsellor na ka bynta ki skul ba kin don bynta ban ïakhun ne ban pynlong ki jingïalap pyrshah drok bad ka Single Use Plastic Eco Recycling la pynlong ha Conference Hall ka SMELC, Dakopgre, Tura.
Haba kren ha ka jingïalang ha kane ka jingleit jngoh jong u sha Garo Hills, u Director School Education and Literacy, Meghalaya Shillong u Bah Banteilang J Kharshandi u la banjur halor ki 3 tylli ki mat kaba ka DREAM Project ba la wanrah da ka tnat Social Welfare kaba ïadei ruh bad ki kam ïalap pyrshah drok.
Haba banjur halor ka jingeh kaba khraw jong u drok ha ka jylla Meghalaya khamtam ha East Khasi Hills u la ong ba ka kam dih drok mynta ka la pur sha ki skul ba dei halor kane ba na ka liang ka tnat ka la sdang ban pynlong ki jingïasyllok bad ki samla pule kiba khlem pat ngat ha une u jingdih uba sniew da ka jingïatreilang bad ka Sanker Hospital, ka rehabilitation Centre ha Shillong ba sumar ïa kiba pang ba kynthup ïa kiba don jingpang ha ki bor pyrkhat.
Na ka liang jong u Director u la pyntip ba ka jingthmu jong kane ka prokram ka long ban jied ïa ki nonghikai na ki skul bad ki nonghikai kiba la shah jied kin hap ban leit ki jingshah hikai na ka bynta 1 bnai ha Sanker Hospital, Shillong ha kaba ka dor jong kane ka jingshah hikai kan long T. 10,000/- ka ban hap ban siew ha ka ratio 50:50 ha kaba kumba 50 percent yn bei na ka Dream project bad 50 percent pat na ki skul bapher bapher. Kine ki nonghikai kin long ruh kum ki facilitator ha ki skul bad kumjuh ruh ha ka imlang sahlang.
U la pynpaw ruh ka jingkyrmen ba ha kine ki 3 bad 4 snem ka jylla kan sa laitluid na u drok. Na ka liang jong u, u la pan ka jingkyrshan na ki principal bad ki nonghikai ba kin mih shakhmat ban ïarap ïa ka jylla bad ïa ka imlang sahlang ha kiba bun ki liang.
Kiwei pat ki mat ba la ïakren ha kane ka prokram ki dei ka jingdonkam ban thung ïa ki dieng ha ka World Environment Day bad ki jingdonkam ban sumar ïa ki.
Haba pyntip ba kane ka prokram kaba la ai kyrteng da ka “Super” (Single Use Plastic Eco Recycling) la pyllait ha Shillong dangshen da ka jingïatreilang bad ka “My Meghalaya My Pride, u Bah Banteilang u la ong ba la shna ïa ka jaka leitbar da kaba pyndonkam ïa ka single use plastic bad ïa kane ka model dei ban pyndonkam ruh ha ki skul kiba don ha Tura bad ban pynïar sha kiwei pat ki skul bad ki jaka jngohkai pyrthei kaba long ruh kum ka khubor ban pynphriang ïa ka khubor ban pyllait ïa ka jylla na ka jingpyndonkam pathar ïa ki pla plastic.”
U la bthah ruh ïa u District School Education Officer Tura ban ithuh ïa ki skul bad ban shna ïa kine ki jaka leitbar ha ka district bad ban pynïar pat sha kiwei ki district.
Ki thup kyrteng ba la shah jied na ka bynta ka DREAM Project ki long ka Don Bosco Secondary School, St. Xaviers Higher Secondary School, Christian Girls Higher Secondary School, Government Boys Higher Secondary School, Government Girls Higher Secondary School, Hawakhana Higher Secondary School, St. Marys Higher Secondary School, Garo Union Higher Secondary School, Little Flower Secondary School, Aeroville Higher Secondary School, Christian Boys Higher Secondary School, Mount Sinai Secondary School, Nokrek Heights, Sherwood Secondary School, Captain Williamson Secondary School, Burny Hills Secondary School and Monfort Centre for Education, Tura.
Kiwei kiba la donlang ha kane ka prokram ki long District School Education Officer (DSEO), Tura R T K Sangma, LSEO, Tura Tengme Marak, ki SEO, ki nonghikai, ki samla pule ka district ki nongtrei ka DSEL, Shillong bad kiwei kiwei.