Jowai, Jymmang, 16: U MLA ka Jowai Constituency Bah Wailadmiki Shylla ha ka sngi Thohdieng ula leit jurip ïa ka jingpyntrei thymmai ïa ka ‘Ïawmusiang Market Complex’ bad ïa kane ka projek la tip kum ka (Re-Development of Ïawmusiang Market Jowai), kaba la sdang ban shna thymmai la saw bnai mynta bad la sakhi ba ka jingpyntrei ïa ka kam ka la long kaba ïaid shait shait la kumba 25%.
U Bah Wailadmiki ha ka jingïakren bad ki lad pathai khubor ula ong kum u MLA u don ka jingkitkhlieh kaba khraw eh na ka bynta ka bha ka miat jong ka Jowai Constituency, khamtam eh ïa kane ka ïew kaba dei ka nongbsa ja ïa ka sor Jowai bad ïa ka Ri-Lum Jaiñtia hi baroh kawei.
Kum u MLA u kyrmen skem ba u Contractor uba pyntrei ïa kane ka kam u lah ban pyndep ïa ka hapoh ka por bala buh, ula ong la kumno kumno haba peit ïa ka rukom pyntrei ïa kane ka ïew lah ban pyndep ïa ka hapoh ka 2 snem.
U la ong ka don ka jingpynkylla ïa ka rukom shna ha ki katto katne ki bynta ka ïew, khamtam ha ki bynta ba pdeng jong ka ïa kaba la thmu ban buh da ka tnum, hynrei la shna noh da ka slap (cement) katkum ka jingdawa jong ka jaka khnang ban shngaiñ hadien habud.
‘Kane ka Ïawmusiang ka la sah teng da ki phew snem’, hynrei naduh ba ula jop kum u MLA ha u snem 2018 ula sdang ban wad ki lad ki lynti ban pyndep noh ïa kane ka ïew wat hapdeng kiba bun ki jingeh. Da kaba u ong hadien bala dep ban pynshna ïa kane ka ïew yn peit bad khmih ïa ka da ka Jaiñtia Hills Autonomous District Council (JHDAC) Jowai.
Ïa kane ka ïew la plie ïa u mawnongrim ban shna thymmai da u Symbud Myntri Rangbah ka jylla Bah Sniawbhalang Dhar ha ka 13 tarik, Nohprah, 2024 ha ka jinglut kaba 25 klur 60 lak tyngka bad la thmu ban pyndep hapoh 24 bnai bad ïa kane ka kam la pyntrei da u Bah Pyrkhat Hinge kum u Contractor.
