Shillong, Jymmang 16: U nongïalam ka liang pyrshah bad u Myntri Rangbah barim ka jylla u Mukul Sangma u la ong ba ka ri India kan ym khih ne shah ktah satia na ki jingjia shah thombor ha ki lehnoh kaba la jia dangshen ha Pahalgam.
“Ka India kan ym shah ktah ne khih eiei halor kine ki jingjia, bad nga ai ka burom kaba khraw halor ka jingshlur, ka jingaiti jong ki shipai kynthei bad shynrang ban ïada ïa ka ri, namar kata ngi ïeng tylli lang bad ka ri halor kane ka jingjia,” ong u Sangma ha ki jingthoh ha social media.
“Ka jingkyrshan jong ka Pakistan ïa ki lehnoh haba ïadei bad ka jingjia ha Pahalgam bad ka jingpyrshang jong ka ban tynjuh bor bad ki shipai ka India ka dei tang ka buit ban pyni ïa ki jingbym ler kam jong ka bad ban ïoh pisa da kaba suk na ki jaka kynshew pisa ba la dep pynlang lypa,” ong u Sangma da kaba bynrap ba ha kine ki phew snem ba la leit ki shipai ka ri Pakistan ki la bun tang ki kam bamsap ha kaba ki bor ba pynïaid ïa ki, ki dei hi na ri Pakistan.
